10-аас дээш жилийн насжилттай тээврийн хэрэгсэл сүүлийн 10 жилд хоёр дахин нэмэгдсэн талаар ҮСХ-оос мэдээлэв.
Агаарын бохирдол бий болгож байгаа эх үүсвэрүүдийн тодорхой хувийг тээврийн хэрэгсэл эзэлдэг. Тэр дундаа тээврийн хэрэгслийн насжилт өндөрсөх тусам агаар, орчны бохирдолд сөргөөр нөлөөлж буй талаар судалгаа бий.
Тэгвэл улсын хэмжээнд бүртгэлтэй байгаа нийт тээврийн хэрэгслийн насжилт ямар байна вэ? Улсын хэмжээнд 2021 оны байдлаар:
- Нийт автобусны 78%
- Нийт ачааны автомашины 95%
- Нийт суудлын автомашины 87% нь 10-аас дээш жилийн насжилттай байна.
Цаг уур, орчны шинжилгээний газраас агаарын чанарын мэдээллийг мөн танилцуулав. 2022 оны 10 дугаар сарын Улаанбаатар хотын агаар дахь агаар бохирдуулах бодисын дундаж агууламжийг өмнөх оны мөн үеийн дундаж агууламжтай харьцуулахад PM2.5 тоосонцор 2 мкг/м3-ээр буюу 6 хувиар, PM10 тоосонцор 12 мкг/м3-ээр буюу 11 хувиар, азотын давхар исэл 7 мкг/м3-ээр буюу 17 хувиар тус тус бага байна. Харин хүхэрлэг хий 6 мкг/м3-ээр буюу 15 хувиар их гарсан байна.
Хүхэрлэг хий бол химийн детергент нэгдэл буюу эд эсийг цочроох төрлийн хий юм. Ийм учраас хүхэрлэг хий ихээр агуулсан агаараар амьсгалахад хүний бие махбодын амьсгалын замд орших эд эсүүд цочирч хэвийн үйл ажиллагаа алдагдаж эхэлдэг. Гэхдээ агаарын найрлагад агуулагдах хэмжээнээс хамаарч харилцан адилгүй нөлөөлөл үзүүлнэ. Судалгаагаар хүхэрлэг хий 1м3 агаарт 50мкг-аас бага агуулагдвал хүний эрүүл мэндэд ямар нэг сөрөг нөлөө үзүүлдэггүй хэмээн үздэг.