Засгийн газрын тусгай сангуудыг Нийтийн мэдээллийн ил тод байдлын хуулийн дагуу www.shilen.gov.mn -д нээж буй.  Тэгвэл ЦХХХ-ны сайд Н.Учрал Байгаль орчин, уур амьсгалын сан, Шинжлэх ухаан, технологийн сан, Гэмт хэргийн хохирогчид нөхөн төлбөр олгох сан, Кино урлагийг дэмжих сан болон Хилийн чанадад байгаа Монгол Улсын иргэдэд туслах сангийн талаар өнөөдөр мэдээлэл өглөө.

Тухайлбал, Кино урлагийг дэмжих сангаас  нийт 11 хуулийн этгээдэд 1 тэрбум 71 сая төгрөг олгожээ.  Кино урлагийг дэмжих санг 2022 онд байгуулж, 2023 онд уран сайхны болон баримтат кино төслийг дэмжих чиглэлээр улсын төсвийн хөрөнгө оруулалтаар 1 тэрбум 71 сая төгрөгийн санхүүжилтийн гэрээ байгуулсан 11 хуулийн этгээдийн гэрээ хэрэгжиж байгаа аж. 

Энэ санд улсын төсвөөс жилд 10 тэрбум төгрөгийг суулгасан. 

Эргэн төлөгдөх нөхцөлгүй санхүүжилтийн төсөлд- Кино бүтээх төсөлд 70 хүртэлх хувийн дэмжлэг үзүүлэх ба үүнээс залуу кино найруулагчийн анхны болон хоёр дахь уран сайхны кино, уран сайхны богино хэмжээний кино бүтээхэд 80 хувь хүртэл, хамтарсан арилжааны кино хамтран бүтээхэд Монголын талын продюсерын санхүүжилтийн 30 хувь хүртэл, артхаус кино хамтран бүтээх бол Монголын талын продюсерын санхүүжилтийн 50 хувь хүртэл хувийн санхүүжилтийг Кино урлагийг дэмжих сангаас дэмжлэг үзүүлнэ" гэж тусгажээ. Эргэн төлөгдөх нөхцөлгүй санхүүжилтийг дараах дөрвөн төрлийн төсөлд олгож байгаа юм. Үүнд: 

1. Кино бүтээх төсөл
2. Монгол киног хадгалах, сэргээн хөрвүүлэх;
3. Олон улсын кино наадам, үзэсгэлэнд монгол киногоор оролцох, Монгол Улсад олон улсын кино наадам зохион байгуулах, төрөөс гадаадад монголын кино урлагийг сурталчлах, кино наадамд оролцох;
4. Кино урлагийн уран бүтээлч, ажилтныг хөгжүүлэх, мэргэшүүлэх үйл ажиллагааг зохион байгуулахад дэмжлэг үзүүлэх.

Эргэн төлөгдөх нөхцөлтэй зээлийн төсөлд - Сангаас олгох зээлийн дээд хэмжээ 1,000,000,000.0 /нэг тэрбум / төгрөг байна.