Медик сэтгэцийн эрүүл мэндийн байгууллагаас “Хүүхэд насны сэтгэлийн гэмтэл, насанд хүрсэн үеийн сэтгэцийн тулгамдсан асуудлуудын тархалт, түүнд нөлөөлж буй хүчин зүйлс болон сэтгэлийн гэмтэл үүсгэж буй үйл явдлуудын хамаарал”-ыг судалжээ.
Судалганд оролцогчдын 9 хүн тутмын 7 нь сэтгэцийн тулгамдсан асуудалтай байсан ба хүүхэд байхдаа 53.3 хувь нь сэтгэл санааны, 36.9 хувь нь бие махбодын, 51.8 хувь нь бэлгийн хүчирхийлэлд, 88.3 хувь нь сэтгэл санааны болон 96.4 хувь бие махбодын үл хайхрах хүчирхийлэлд өртөж байсан байна.
Нийт оролцогчдын,
- 78.9 хувь нь сэтгэцийн тулгамдсан асуудалтай
- 68.3 хувь нь стресстэй
- 68 хувь нь сэтгэл гутралтай
- 67.3 хувь нь сэтгэл түгшилтэй
- 6.8 хувь нь нойргүйдэлтэй байв.
Сэтгэцийн тулгамдсан асуудал үүсэхэд, 35-аас доош настай, эмэгтэй, огт гэрлээгүй, 1 сая хүртэл орлоготой байх нь илүүтэй нөлөөлж буй дүгнэлт гарчээ.
Мөн хүүхэд насны сэтгэл зүйн гэмтэл нь сэтгэцийн тулгамдсан асуудал болох стресс, сэтгэл гутрал, сэтгэл түгшилт, нойргүйдэлтэй шууд хамааралтай болохыг тогтоосон байна. Тухайлбал, 1.6-17.1 дахин сэтгэл гутрал, 1.9 -9.6 дахин сэтгэл түгшилт, 2.3-3.3 дахин нойргүйдэлд өртөх эрсдэлийг тус тус нэмэгдүүлж байна.
Уг судалгаа нь сайн дураар хамрагдахыг зөвшөөрсөн тохиолдлуудыг хамруулсан хязгаарлагдмал талтай байсан хэдий ч Монгол улсад хүүхэд насны сэтгэлийн гэмтэл, насанд хүрсэн үеийн сэтгэцийн тулгамдсан асуудлуудын хоорондын хамаарлыг судалсан анхны судалгаа болж байна.
Уг судалгааны зорилго нь сэтгэлийн гэмтэл бүхий үйлчлүүлэгчдэд үзүүлэх тусламж үйлчилгээний цар хүрээ, зохион байгуулалт, хэлбэр зэрэг голлох чиглэлүүдийг шинжлэх ухааны үндэслэлтэйгээр төлөвлөн нотолгоонд суурилсан сэтгэцийн эрүүл мэндийн тусламж үйлчилгээний чанарыг сайжруулах ач холбогдолтой юм.
Уншигч та сэтгэцийн эрүүл мэндийн талаар чанартай, шинжлэх ухаанч, баттай эх сурвалжаас нэгдсэн мэдээлэл, ойлголт, зөвлөгөө авахыг хүсвэл Медик байгууллагаас эрхлэн гаргадаг Colorful mind сэтгүүлийг санал болгож байна.
Ташрамд хэлэхэд, Үндэсний номын баяр 2022 оны 09 сарын 16-18-ны өдрүүдэд төв талбайд зохион байгуулагдаж байгаа бөгөөд уг сэтгүүлийг худалдан авах боломжтой юм. Мэргэжлийн сэтгэл зүйч, сэтгэцийн эмч, сэтгэл засалчдаар багаа бүрдүүлсэн тул таны сэтгэл зүйн мэдлэг боловсролд үнэтэй хувь нэмэр оруулна гэдэгт сэтгүүлч миний бие итгэлтэй байна.
"Colorful mind" сэтгэцийн эрүүл мэндийн сэтгүүлээс...