МУЗГ, БНФУ-ын Засгийн газар хоорондын Санхүүгийн хэлэлцээрийн хүрээнд манай улсад агаарын аврах ажиллагааны нэгж байгуулах, 4 нисдэг тэрэг нийлүүлэх юм.
Уг төслийн хүрээнд өчигдөр агаараас эрэн хайх, яаралтай тусламжийн зориулалттай, “EC-145” маркийн хоёр нисдэг тэргийг Замын-Үүдийн боомтоор оруулж иржээ.
Хэлэлцээр ёсоор EC-145 маркийн 3 нисдэг тэрэг, сургалтын 1 нисдэг тэрэг болон сургалтын симулятор нийлүүлэгдэж, нисгэгч, инженер-техникийн ажилтан, аврагч нарыг бэлтгэх юм.
Сүүлийн 30 жилийн хугацаанд орхигдоод байсан агаарын аврах ангийг дахин сэргээн байгуулснаар онцгой байдлын албаны үйл ажиллагаа өргөжин тэлж, эрэн хайх, аврах ажилд томоохон ахиц дэвшил болох ач холбогдолтой.