Амьдардаг орцноосоо авхуулаад гудамж талбай, автобусны буудал, нийтийн тээвэр гээд хаа сайгүй хэрэглэсэн амны хаалтаа хаях болоод уджээ. Бүгд биш ч иргэдийн ухамсаргүй эл үйлдэл аюултай хог хаягдал болохыг Мэргэжлийн хяналтын байгууллагаас анхааруулсаар байна.
Дотооддоо халдвар алдаж, Улаанбаатар хотод голомтлон гарч буй энэ цаг үед хэрэглэсэн амны хаалтаа олны хөлийн газар дэлгэж хаях нь зохистой үйлдэл юм. Цаашлаад тухайн амны хаалтыг ямар ч халдварт өвчинтэй хүн хэрэглэсэн байж болзошгүй тул иргэд та бүхэн хэрэглэсэн амны хаалтыг зориулалтын уутанд хийж хогийн саванд хаяна уу.
Мэргэжлийн хяналтын байгууллагаас эмнэлэг, үйлчилгээний байгууллагуудын хог хаягдлыг хянаж шалгадаг. Харин айл өрхийнхийг хянах боломжгүй. Тиймээс иргэд өөрийгөө болон гэр бүлийн гишүүд, бусдын эрүүл мэнд, аюулгүй байдлыг бодож ухамсартай хандах хэрэгтэй.
Амны хаалтыг хэрхэн зөв зүүж, тайлж хаях вэ?
- Амны хаалтыг зүүхийн өмнө гараа спиртэн суурьтай халдваргүйжүүлэгч эсвэл савангаар угаах
- Амны хаалтыг хамар, амыг бүрэн хааж, завсар гаргахгүйгээр зүүх. Амны хаалтыг зүүсэн үедээ гараа хүргэхгүй байх, хүрсэн тохиолдолд гараа спиртэн суурьтай халдваргүйжүүлэгч эсвэл савангаар угаах
- Амны хаалт чийгтэй болсон тохиолдолд шинээр солих. Нэг удаагийн амны хаалтыг дахин хэрэглэж болохгүй
- Амны хаалтыг тайлахдаа (урд хэсэгт хүрэлгүйгээр) чихний арын хэсгээс татан авч шууд хогийн саванд хаях. Дараа нь гараа спиртэн суурьтай халдваргүйжүүлэгч эсвэл савангаар угаах.
