Улсын хэмжээнд энэ оны 9 дүгээр сарын 21-ний байдлаар Архангай, Баян-Өлгий, Булган, Дархан-Уул, Дорнод, Хэнтий, Сүхбаатар, Сэлэнгэ, Өвөрхангай, Төв, Ховд, Хөвсгөл, Увс, Завхан, Говь-Алтай аймгийн 58 суманд 118, нийслэлийн 4 дүүрэгт 4, нийт 122 удаагийн ой, хээрийн түймэр бүртгэгджээ.

Ой, хээрийн гал түймрийн дуудлагын тоог өмнөх оны мөн үеийнхтэй харьцуулахад 78.8 хувиар нэмэгдэж, дээрх түймэрт урьдчилсан байдлаар ойн 9917 га, хээрийн 1,250,910 га, нийт 1,260,827 га талбай өртсөн байна. Ой, хээрийн түймэр унтраахад онцгой байдал, хил хамгаалах, цагдаагийн байгууллага, орон нутгийн 5252 хүн ажиллажээ.

Өчигдрийн байдлаар, Сэлэнгэ аймгийн Ерөө сумын Буурагчин багийн “Шарлангийн голын Ягаан-Ам гэдэг газарт, мөн Баян-Өлгий аймгийн Алтай сумын Бардам 3 дугаар багийн “Даваат” гэдэг газарт хээрийн түймэр гарсныг аймгийн ОБГ-ын Гал түймэр унтраах, аврах ангийнхан унтрааж байнА. Түүнчлэн, Дархан-Уул аймгийн Хонгор сумын 2 дугаар баг “Хүйтний гол" гэдэг газарт ой хээрийн түймэр гарсныг цурманд оруулаад байгааг ОБЕГ-аас мэдээлэв.

Манай улсын газар нутгийн 8 хүрэхгүй хувийг ой мод эзэлдэг. Ойн түймрийн улмаас энэ хувь хэмжээ жил ирэх тусам хорогдсоор байна. Таны хаясан хог, дутуу унтраасан гал ойг түймэрдэх зэвсэг болдог.

Түймэр нь хүний санамсар болгоомжгүй үйлдлээс бий болдог учир иргэн бүр хариуцлагатай ухамсартай байхыг алба хаагчид, гал сөнөөгдчид уриаллаа. Ойн түймрийн аюулаас та бид урьдчилан сэргийлж чадна. Асаасан галаа бүрэн унтрааж, байгаль дэлхийдээ хог хаяхгүй байх маш энгийн алхмуудыг хэвшүүлээрэй.