Улаанбаатар хотын баруун тал Баянхошуунд "Гүнжийн нүдэн нуур" байдаг бөгөөд хашаа, цементэд шахагдан устах аюул учирсан тул нуураа хамгаалах зайлшгүй шаардлагатай байгаа талаар "Усны газар"-ын дарга З.Батбаяр дараах мэдээллийг цахим хуудастаа нийтэлжээ. 

Эрт цагт Толуй эзний хатан Сорхогтан (Соргог хатан) бэхи энэ нуурын уснаас хүртэн сууж дэлхийг донсолгосон их хаад болон 4 хүүдээ (Мөнх, Хубилай, Хүлэг, Аригбөх) алтан тэвшийн хөдийн тухай, ард түмэн улс орныг хэрхэн удирдах, ус голоо яаж дээдлэх тухай сургаал үгээ хайрлан суусан гэдэг хууч яриа бий.

Энэ сайхан нуураа хамгаалан авч үлдэх зайлшгүй шаардлага тулгараад байна. Хашаа болон цементэд шахагдан хоног өдрөө тоолон буй Гүнжийн нүдэн нуурыг авран хамгаалах арга нь хамгаалалтын бүс, нуур усанд байгалийн аясаар өөрөөрөө нөхөн сэргэх боломжийг олгох асуудал юм.

Энэ долоо хоногийн сүүлээр буюу 6 дугаар сарын 7-ны өдөр "Бид Туул голынхон" ТББ, "Усны газар",  Туул голын сав газрын захиргаа хамтран "Гүнжийн нүдэн нуур"-аа хамтдаа хамгаалъя сэдэвт хүүхэд багачуудад зориулсан гол усаа хамгаалах тухай танин мэдэхүйн арга хэмжээ зохион байгуулна. 

Энэ сайхан нуурын эрэг дээр нэгэн хөөрхөн номын сан байдаг. Тэрхүү номын санг түшиглэн энэ арга хэмжээг зохион байгуулж байгаа бөгөөд номын санд хүүхдийн болон бусад бүх төрлийн ном хандивлах үйл ажиллагааг ч эхлүүлж байгаа юм. Иймд усанд хайртай, ус голоо хамгаалахын төлөө санаа тавьж явдаг бүх хүмүүсээс энэ нуурын асуудалд анхаарал хандуулах, бүх талаар дэмжихийг уриалж байна. 

Хуучин ном, сэтгүүл, гадаад дотоод хэл дээр бүх төрлийн байж болно. Сонгинохайрхан дүүрэгийн төрийн байгууллагууд, Нийслэлийн Байгаль орчны газар-ыг энэхүү үйл ажиллагаанд оролцохыг нуурандаа илүү их анхаарал халамж тавихыг уриалж байна.

Хамтдаа үр хүүхдүүд, ирээдүй хойчийнхоо төлөө Гүнжийн нүдэн нуураа, гол усаа, рашаан булгуудаа хатааж ширгэх, бохирдож бузартахаас хамгаалцгаая" хэмээв.