Хуш модны самрыг болц гүйцсэн үед буюу 10-р сарын 20-ноос дараа оны 2-р сарын 1-ны хооронд түүхийг зөвшөөрдөг.

Болц гүйцээгүй самар түүснээр ой хортон шавжид нэрвэгдэх, экосистемийн тэнцвэр алдагдахад хүрч, самраар хооллогч шувуу, мэрэгчид, амьтдын хүнс тэжээлд сөргөөр нөлөөлдөг.

Болц гүйцээгүй боргоцой нь давирхай ихтэй тул хүмүүс модны гол ишийг мунаар цохиж самрыг унагаадаг нь гол ишийг гэмтээх, хатаах, модлогийн хортон үүрлэх, давирхай их хэмжээгээр гоожих зэрэг сөрөг үр дагаварт хүргэдэг. 

Мөн ахуйн нөхцөлд самрыг гараараа цөмж иддэгээс давирхайтай самар нян үүсгэх нөхцөл бүрддэг. Учир нь давирхайн дээр эргэн тойрон дахь тоос, шороо элдэв бохирдол наалдсан байдаг. Үүний улмаас халдварт шар, гэдэсний бусад хурц халдварт өвчнүүд үүсэх аюултай. 

Иймд зөвшөөрөгдсөн хугацаанаас өмнө болц гүйцээгүй үед самар түүхгүй байхыг анхааруулж байна. Болц гүйцсэн үед нь самрыг зохих хэмжээнээс хэтрүүлэхгүй зөв түүснээр дараа жил хуш  мод дахин самраа өгөх, байгалиа хайрлаж буй үйлдэл юм шүү.