Эхийн хэвлийд ураг бүрэлдэн тогтсоноос хойш жирэмсэн эмэгтэйн биед физиологийн маш олон өөрчлөлт гардаг. Тухайлбал хоолны дуршил өөрчлөгдөх, жирэмсний бөөлжилт илрэх, гэдэсний гүрвэлзэх хөдөлгөөн буурч өтгөн хаталт үүсдэг.
10 жирэмсэн эмэгтэй тутмын дөрөвд нь өтгөн хаталт илэрдэг гэсэн тоо баримт байдаг бөгөөд жирэмсний эхний гурван сараас шинж тэмдгүүд нь үзэгдэж эхэлдэг байна.
Жирэмсэн үед өтгөн хатах хэд хэд шалтгаан бий. Прогестероны хэмжээ нэмэгдсэнээр хоол боловсруулах замын хөдөлгөөн удаашрах, төмөр агуулсан жирэмсний витамин хэрэглэх, жирэмсний хожуу үед, ураг шулуун гэдсийг шахсанаас өтгөн гадагшлалт удааширдаг. Өтгөн хаталтанд арга хэмжээ авахгүй, удаан явбал шамбарамтай болох магадлалтай.
Өтгөн хаталтын үед ямар арга хэмжээ авах вэ?
- Бүхэл үрийн талх, үр тариа, жимс, хүнсний ногоо зэрэг эслэг өндөртэй хоол хүнс хэрэглэх нь тохиромжтой. Мөн өдөрт дор хаяж 1,5 литр цэвэр ус уугаарай.
- Алхах, усанд сэлэх, жирэмсний дасгал хөдөлгөөн хийх нь өтгөн хаталтаас урьдчилан сэргийлэхэд тустай.
- Цай, кофе, хийжүүлсэн ундаа зэрэг шээс их хүргэдэг уух зүйлсээс зайлсхийгээрэй. Биеийн шингэнийг хөөх үйлчилгээтэй эдгээр зүйлс өтгөн хаталтыг улам нэмэгдүүлдэг.
- Мөн зүсэм лимон, жамц эсвэл ягаан давстай бүлээн ус уух нь гэдэсний гүрвэлзэх хөдөлгөөн сайжруулах, гэдэс цэвэрлэх, өтгөн хаталтыг багасгахад үр дүнтэй. Хоол идэхдээ эхлээд салат, ногоо, жимс идэх нь тустай.
- Төмрийн бэлдмэл нь цус багадалтад сайн нөлөөтэй ч өтгөн хаталтыг нэмэгдүүлдэг. Хэрвээ ууж буй бэлдмэл өтгөн хатаагаад байвал өөр төрлийн төмрийн бэлдмэлийг хэрэглээд үзээрэй. Хуурай биш шингэн бэлдмэлүүд илүү тохиромжтой. Цус багадалттай гэж оношлогдсон бол мах, гүн ногоон өнгөтэй хүнсний ногоо зэргийг хэрэглэх нь тустай.
- Ашигтай бактер өтгөн хаталтын эсрэг сайн нөлөөтэй.
- Багваахай цэцэг, жамба цэцгийн цай өтгөн хаталтын эсрэг үр дүнтэй.
- Хөлийн ул буюу хөлийн нумын хэсэг хоол боловсруулах тогтолцоотой холбоотой тул энэ хэсэгт иллэг хийх нь өтгөн хаталтын үед мөн сайн нөлөө үзүүлнэ.
Эх сурвалж: Babycenter.com