Хосын харилцаа, гэр бүлийн уур амьсгал, хайрын мэдрэмж, хайрлах, хайрлагдах мэдрэмжийн талаар сэтгэл зүйч, сэтгэцийн эмч нарын яриаг түүвэрлэн хүргэж байна.
Хүний аз жаргалын индексийг хамгийн сайн бүрдүүлдэг зүйл нь гэр бүлийн халуун дулаан харилцаа
Гэр бүл гэдэг бидний хамгийн их өөрөөрөө байж чадах газар бөгөөд амьдралын чухал хэсэг. Нийгмийг бүрэлдүүлдэг жинхэнэ эд эс нь гэр бүл. Гэр бүлийн хүмүүсийн харилцаа, уур амьсгал эрүүл байснаар тухайн гэр бүл аз жаргалтай байх боломж бүрдэнэ. Хүний аз жаргалын индексийг хамгийн сайн бүрдүүлдэг хүчин зүйлс гэр бүл дотор л байдаг.
Бид бүхний хамгийн аз жаргалтай, амар тайван, сэтгэл ханамжтай байх ёстой газар бол гэр. Гэр бүлийн халуун дулаан харилцаа, эерэг уур амьсгалаас бидний амьдралын амжилт, карьер, эрүүл мэнд гээд олон зүйлс шалтгаалдаг. Тиймээс гэр бүлийн уур амьсгалаа сайжруулах нь зөвхөн эхнэр эсвэл нөхрийн хийх ёстой ажил үүрэг биш. Бүгд ижил тэнцүү оролцоотой байх хэрэгтэй юм.
Залуу насандаа аз жаргалтай амьдарсан бол нас ахисан ч тэр аз жаргал байсаар л байна
Магадгүй улам бүр хайртай болдог тохиолдол ч олон. Эсэргээрээ залуу гэр бүл байхдаа урт хугацаанд үргэлжилсэн тодорхой асуудлуудтай байсан бол нас ахих тусам нөгөөх нь ужгирдаг. Хуурамч, эв түнжингүй, хоорондоо байнгын хэрүүл маргаантай, архидалт, сексийн асуудалтай байсан гэх мэт. Эдгээр шалтгаанууд олон жил үргэлжилж, гомдол, тунирхлаа тайлахгүй урт хугацаанд явчихсан байвал тодорхой хугацааны дараа энэ нь бие биенээсээ бүх зүйлээрээ хөндийрөх шалтгаан болдог. Асуудал байна гэж олж харсан л бол бага дээр нь, залуудаа шийдэх хэрэгтэй.
Хүлээн зөвшөөрнө гэдэг хосуудын сэтгэлийн дархлаа тогтож буйн илэрхийлэл
Нэг зүйлийг хэзээ ч битгий март. 20 гарч уулзаж, учирчихаад нэгнээ өөрчлөхөөр амьдарна гэдэг нь өөрөө утгагүй. Ийм ойлголт ерөөсөө байхгүй гээд бодчих. Эхлээд өөрчлөх гэдэг үгнээсээ салчихвал буулт хийж, хүлээн зөвшөөрөхөд төвөггүй болно. Хайрын хамгийн тод илэрхийлэл бол хүлээн зөвшөөрөх явдал. Дөнгөж дурлаж, хайрлаж буй эхний үедээ муухай ааш нь хүртэл гоё санагддаг. Хайр их байгаа үед хүлээн зөвшөөрч чаддаг. Хүлээн зөвшөөрнө гэдэг нь хосуудын сэтгэлийн дархлаа тогтож буй үйл явц юм.
Хайрын харилцаа тархийг илүү их хөгжүүлж, тэжээн тэтгэдэг
Байгаагаараа хайрлагдах сайхан. Яг л үүн шиг хайртай хүнээ байгаагаар нь хүлээн зөвшөөрч хайрлаарай. Хэн нэгний хувьд үнэ цэнэтэйгээ мэдрэх нь сэтгэлээр өөдрөг, аливааг хийх эрч хүчтэй, амьдралыг утга учир аз жаргалтай болгодог. Хайрлагдах үед бидний стресс түгшүүр арилж, тайвширч, догдолж баяр жаргалтай болдог. Хайрын харилцаа нь тархийг илүү их хөгжүүлж, тэжээн тэтгэж байдаг. Тиймээс таныг хайрладаг хэн нэгэнтэй илүү их цагийг өнгөрүүлээрэй. Бас хайртай хүндээ хайрлаж буй мэдрэмжээ илэрхийлж байгаарай.