Хаврын улиралд явдал мөрөө хэрхэн зохицуулах вэ? 

Хаврын улиралд явдал мөрийг хүчилж, хөдөлгөөн сайн хийж байх талаар ном сударч бичсэн байдаг. Өглөө эрт босч явган алхаж, гүйх зэргээр өдөртөө 30 минут дасгал хөдөлгөөн хийх нь сайн.

Хавар дулаан хувцаслаж, халуун дулаан орчинд ажиллаж амьдрах, даарч хөрөхгүй байх хэрэгтэй. Дулаан хувцаслахгүй, даарснаас болж ханиад томуу, бөөрний өвчлөлд өртөх нь элбэг.  Хаврын улиралд бадган хөдөлж бадганы сэрүүн чанартай ходоод, бөөр, уушгины өвчнөөр өвдөх магадлал өндөр болдог. 

Мөн шөнө унтах цагаараа сайн унтаж амраад, өдөр унтахгүй байх хэрэгтэй. Өдөр унтах заалттай хүмүүс буюу хүүхэд, хөхүүл эмэгтй, хүнд өвчтэй хүн, ахмад настнуудаас бусад нь өдөр унтаж болохгүй. 

Өдөр унтвал бадган аривдаж хавдана, таргална. Бадган ихэсвэл ой тогтоолт муудах, нозоорох, залхуурах, бие хүндрэх, сэтгэл хүндрэх, ажил үйл хийхэд дургүй болох, хоолны шингэлт муудах, таргалах, нус цэр ихсэх зэрэг шинжүүд илэрдэг. Тиймээс бие, хэл, сэтгэлийн зохистой үйлийг идэвхи чармайлттай хийх хэрэгтэй. Хувцсаа нимгэлэх гэж бүү яар. Сэтгэл санаагаа сул тавиад хэрэггүй.

Хаврын улиралд ямар идээ унд хэрэглэх вэ?

Билгийн тооллын хаврын тэргүүн сараас хаврын дунд сар дуустал буюу 02.15- 04.15 хүртэл үргэлжлэх үе.  Энэ үед ходоодны галын илч суларч шингээх чадвар буурдаг. Иймд "үүц" махаа задалж, хааяа яргуй идсэн ямааны махаар хоол хийн иддэг. 

Шар тос, цагаан тос, өөх тослог зүйл, өрөм, хайлмаг, ээзгий, бяслаг, зөөхий, ааруул зэрэг цагаан идээ цайндаа хийн идэх нь ходоодны галын илчийг сэлбэж, хаврын хавсарга, салхи жаврыг давахад тустай. 

Мөн ширүүн, илчлэг, бүлээн, хөнгөн чанартай хоол хэрэглэж, хоолны хэмжээг багасгана. Хүний ходоодны хэмжээ өөрийн хоёр алгыг нийлүүлж тоссон хэмжээтэй байдаг. Үүний дөрөвний гуравт нь хоол ундаа тохируулан хэрэглэх нь шингээх үйлдлийг сайжруулдаг. 

Хориглох унд: Ногоон цай, хар цай, липтон цай зэрэг сэрүүн чадалтай цайг энэ улиралд хэрэглэх нь зохисгүй. Түүхий, хүйтэн сүү хэрэглэж болохгүй. Махан идээг багасгаж шар идээг түлхүү хэрэглэх нь зүйтэй. 

Эх сурвалж: Уламжлалт Анагаах Ухаан