Хаягдал ус дахин боловсруулах үйлдвэрийн зураг төсөл боловсруулж, барилга угсралтын ажил гүйцэтгэх гэрээ хүчин төгөлдөр болов. Мянганы сорилтын сангийн компакт гэрээний санхүүжилтээр барих Хаягдал ус дахин боловсруулах үйлдвэрийн зураг төсөл боловсруулж, барилга угсралтын ажил гүйцэтгэх гэрээг 2022 оны 05 дугаар сарын 10-ны өдөр үзэглэлээ.
Хаягдал ус дахин боловсруулах үйлдвэрийн бүтээн байгуулалтын ажлыг хариуцан гүйцэтгэхээр шалгарсан “М-Си-Эс Проперти” нь М-Си-Эс группийн салбар компани бөгөөд нийт 60 гаруй төслийг, үүн дотор Шангри-Ла цогцолбор, Кока-Кола үйлдвэрийн барилга, Скай Резорт гольф, цанын бааз, Интермед эмнэлэг, НУБИА Онгоцны засвар үйлчилгээний байгууламж, Белла Виста тансаг зэрэглэлийн орон сууцны хороолол, Оюу Толгойн гүний уурхайн барилга байгууламжууд, Ухаа Худаг уурхайн бүтээн байгуулалтууд зэрэг томоохон төслүүдийг хэрэгжүүлсэн дотоодын компани юм.
Хаягдал ус дахин боловсруулах үйлдвэрийн бүтээн байгуулалтын ажил 2025 оны нэгдүгээр улиралд дуусч, туршилт тохируулгын ажил хийгдсэний дараа буюу 2025 оны хоёрдугаар улиралд ашиглалтад орох юм.
Хаягдал ус дахин боловсруулах үйлдвэр ашиглалтад орсноор шинээр баригдаж буй Төв цэвэрлэх байгууламжаас гарах цэвэрлэсэн уснаас өдөрт 50 мянган метр кубыг дахин боловсруулж, дулааны цахилгаан станцуудад техникийн зориулалтаар нийлүүлж эргүүлэн ашиглах юм.
Ингэснээр жилдээ 18 сая метр куб гүний цэнгэг усыг хэмнэж, Улаанбаатар хотын хүн амын унд, ахуйн хэрэгцээнд ашиглах боломж бүрдэх аж. Гэрээнд Монголын Мянганы сорилтын санг төлөөлж Гүйцэтгэх захирлын үүрэг гүйцэтгэгч Г.Уранчимэг, Хаягдал ус дахин боловсруулах үйлдвэрийн зураг төсөл боловсруулах, барилга угсралтын ажлын гүйцэтгэгчээр шалгарсан “М-Си-Эс Проперти” ХХК-ийг төлөөлж Гүйцэтгэх захирал Б.Даваа-Очир нар гарын үсэг зурав.