ЗХУ-ын үед Владивостокийн Уссурын хоолой орчмын эрэг албан ёсны хогийн цэгээр тооцогддог байжээ. Шилний хаягдлыг машин машинаар авчирч хаядаг байсан энэ газар олон жилийн дараа гайхалтай юм болж, шилнүүдийн хагархайг далайн ус шүүрдэн угааж, өнгөлөн мөлийлгөсөөр эрэг өнгө өнгийн шилэн хайргаар гялтганан гялалзаж ер бусын гоёмсог харагдах болжээ.
Ийнхүү байгаль хүмүүсийн муу үйлийг залруулан өөрчилснөөр Уссурын хоолойн энэхүү шилэн эрэг солонгын долоон өнгөөр гялалзан гялтганаж байна. Нутгийн оршин суугчид төдийгүй жуулчид энэхүү гоёмсог газрыг зорин ирдэг болсноор одоо хамгийн алдартай наран шарлагын газрын нэг болсон гэнэ. Өнгө өнгөөр гялалзах гоёмсог шилнүүдийг дурсгалын зүйлс болгон түүж авах хүмүүс ч цөөнгүй.
Мөн өвөл ч хүмүүс олноор ирж, цагаан цасан дундаас солонгорон харагдах ер бусын дүр зургийг таашаан харах болсон байна. Ийнхүү олон жилийн өмнө хэн ч зүглэдэггүй хогийн цэг байсан газрыг одоо хамгаалалтын бүс болгожээ.