Таны хүүхэд орондоо, эсвэл өмдөндөө ойр ойрхон шээгээд байна уу. Хэрэв энэ үзэгдэл 3, 4-өөс дээш насанд тохиолдож буй бол үүнийг орондоо шээх эмгэг гэж үздэг.
Хүүхэд унтахынхаа өмнө их шингэн зүйл уусан зэргээс болж орондоо шээх тохиолдол бий. Гэвч долоо хоногт гурав, дөрөв, түүнээс ч олон удаа орондоо шээгээд байвал энэ бол яах аргагүй эмгэг мөн. 16 нас хүртэлх ямар ч хүүхдэд тохиолдож болно. 13, 14 хүрчихсэн мөртлөө орондоо, эсвэл өмдөндөө шээх эмгэгтэй хүүхэд ч байдаг.
Ийм тохиолдолд, юуны түрүүнд урологи болон бөөрний эмчид үзүүлж, шалтгааныг нь тодорхой болгох хэрэгтэй. Тэгээд шээсний замын ямар нэг өвчин байхгүй бол сэтгэцийн эрүүл мэндийн байгууллагад хандаж заавал эмчлүүлэх шаардлагатай. Хүүхэд тань сургууль, цэцэрлэг дээрээ багштайгаа, хүүхдүүдтэй таарамжтай харьцаатай байж чадаж байгаа юу гэдэгт анхаарал тавих ёстой. Сэтгэл зүйн асуудал байгаа учраас орондоо болон өмдөндөө шээдэг. Олон нийтийн өмнө өмдөндөө шээснээсээ болж бусдаас ичиж зовох, улмаар үүнээсээ болж гутарч гуних зэрэг сэтгэл зүйн хүнд асуудлуудыг араасаа дагуулдаг учраас заавал арга хэмжээ авах хэрэгтэй юм.
Голчлон бага насанд илэрдэг эмгэг учраас хүүхдэдээ үзүүлэх хайр халамж нэн тэргүүнд чухал. Ялангуяа эцэг, эхчүүд нь гадаад явчихсан зэрэг шалтгаанаар эмээ, өвөө дээрээ өсч байгаа хүүхдүүд байна. Хэдийгээр эмээ, өвөө нь хайрлаж халамжилж байгаа ч аав, ээжийн хайрыг орлодоггүй учраас үүнээс болж орондоо шээх эмгэгтэй болсон хүүхэд СЭМҮТ-д нэлэдгүй ирдэг байна. Мөн хүүхдийг сайн хооллох, сайн унтуулж амраах нь маш чухал юм шүү.
СЭМҮТ-ийн Хүүхэд, өсвөр үеийн клиникийн эмч Ц.Орхонсэлэнгэтэй хийсэн ярилцлагыг бүрэн эхээр нь ЭНД ДАРЖ уншина уу.