Халдварт өвчин судлалын үндэсний төв, ЭМЯ, ЭХЭМҮТ-өөс Томуу, Томуу төст өвчний нөхцөл байдлын талаар мэдээлэл хүргэж байна. /2024.11.29/

Улсын хэмжээнд өвчлөлийн тархалт алаг цоог түвшинд байгаа бөгөөд амбулаторийн 7 орчим хувийг эзэлж байна. Нийт эмнэлэгт хэвтэж буй хүмүүсийн 28 хувь нь амьсгалын замын цочмог халдварт өвчинтэй байна. Насны хувьд нийт өвчлөлийн 80 хувийг 15 хүртэлх насны хүүхэд, үүний дотор 40-60 хувийг нь 5 хүртэлх насны хүүхэд эзэлж байна. 

Өмнөх жилтэй харьцуулахад өвчлөлийн тархалт, хүндрэл нэмэгдсэн үзүүлэлттэй байна. 

 5-19 насны хүүхдүүд тэр дундаа цэцэрлэгийн ахлах анги, сургуулийн банга ангийн хүүхдүүд өвчлөлд илүүтэй өртөж байна. 

Орны ачаалал, нийт хэвтэн эмчлүүлэгсдийн 68 хувь нь Улаанбаатар хотод, үүнээс 70 хувь нь дүүргийн эмнэлгүүдэд хэвтэн эмчлүүлж байна. Нийслэлд 1300 ор, 10 аймагт нэмэлтээр 305 ор дэлгэн ажиллаж байгаа аж. 

Ханиад томууны үед суулгалт бөөлжилтийн эсрэг гэрийн асаргаа, хооллолтын талаар дараах зөвлөгөөг өглөө. 

Сүүлийн 24 цагт 4 буюу түүнээс дээш удаа шингэн, эмгэг хольцтой, энгийнээс шингэн ялгадас гарахыг суулгалт гэж үзнэ. Суулгалт бөөлжилтөөр хүүхэд эрдэс давс, шингэнээ биеэс их хэмжээгээр алдах, жин буурах, өвчлөлд улам өртөмтгий болох зэрэг хүүхдийн бие, эрүүл мэндэд хүндрэл үүсгэдэг. Суулгалт бөөлжилтийн үед гэрийн асаргаар цаг алдалгүй, зөв хийвэл 5-7 хоногт гэрээр эмчлэгдэх боломжтой. Үүнд: 

• Шингэн зүйлийг ердийнхөөс ойр ойрхон бага багаар өгнө. Уснаас гадна хросол өгөх нь зүйтэй. Бага багаар бүлээнээр бөөлжүүлэхгүйгээр өгнө. Бөөлжвөл 10 минут хүлээж байгаад дахиад өгнө. 2-оос доош насны хүүхдэд суулгалт бөөлжилтийн араас 50-100мл хросол, 2-оос дээш насны хүүхдэд 100-200 мл хросол уулгаж чадвал шингэн алдалтаас сэргийлж чадаж байна гэж үзнэ. 
• Хоолны дэглэм баримтална. Шөлтэй, шингэн бүтэцтэй, гэртээ хийсэн хоол өгөх нь зүйтэй. Чихэрлэг хүнс суулгалтыг улам даамжруулдаг тул өгөхгүй байх нь зөв.
• Ариун цэврийн дэглэм баримтална. Гаднаас орж ирсэн хүмүүс гараа угааж, амаа зайлж байж хүүхдэдээ хүрнэ. 
• Аюултай шинжүүдийг анзаарах. Хүүхэд унтаараад, тайван бус цочимхой болох, нүд нь хонхойх, зулай нь хонхойх, уйлахад нулимс гарахгүй, ердийнхөөс бага хэмжээнд шээх, уух хөхөх чадваргүй байвал эмнэлэгт яаралтай хандаж эмчийн заавраар эмчилгээ хийлгэхийг анхааруулж байна. 

БИЧЛЭГ: