БНХАУ 2021–2022 оноос вэйп (электрон тамхи)-ийг янжуур тамхитай адил ангилалд оруулж, маш хатуу зохицуулалт хийж эхэлсэн. Шалтгаан нь залуу үеийнхний амьдралын зөв хэв маягийг дэмжих, эрүүл мэндийг хамгаалахад чиглэгдэж байгаа юм.

Электрон тамхины хэрэглээг хязгаарлахын тулд “Тамхины монополын тухай хууль”-д нэмэлт өөрчлөлт оруулан “Тамхины монополын тухай хуулийн хэрэгжилтийг хангуулах журам”, “Электрон тамхины удирдлагын арга хэмжээ”-г шинээр батлуулан хэрэгжүүлж байгаа аж. 

Эдгээр эрх зүйн баримт бичгүүдэд хэд хэдэн чухал өөрчлөлтүүдийг оруулжээ. Тухайлбал, 

• Электрон тамхийг янжуур тамхитай адилтган үздэг болсон ба төрийн хяналт, лицензийн тогтолцоонд оруулан үйлдвэрлэл, бөөний болон жижиглэн худалдаа, импорт, экспортыг бүгдийг тусгай зөвшөөрөлтэй болгосон.
• Жимс, чихэр, ундааны амттай (flavored) вэйпийг дотоодын зах зээлдээ хоригложээ. Энэ нь өсвөр насныхны хэрэглээг бууруулах зорилготой үйлдэл гэж Хятадын засгийн газраас тайлбарласан.
• Тамхины монополын тухай хуулиар вэйпийг насанд хүрээгүй хүнд худалдах, сурталчлах, хэрэглээг дэмжих зэргийг бүрэн хоригложээ.
• Электрон тамхинд хэрэглээний татвар ногдуулж эхэлсэн бөгөөд үйлдвэрлэл болон импортод 36%, бөөний худалдаанд 11%-ийн татвар буюу нийтдээ 47%-ийн татвар төлдөг болжээ. Үүн дээр жижиглэн худалдаанд НӨАТ-ын татвар мөн бодогддог байна.

Хятадын засгийн газраас барьж буй бодлогын гол зорилго нь вэйпийг “тамхины шинэ төрөл” гэж үзэн төрийн монопол хяналтад оруулах, өсвөр үеийн хэрэглээг бууруулах, үйлдвэрлэлийг төвлөрүүлэн хянахад чиглэгдэж байна гэж өдөр тутмын “Global Times” сэтгүүлд дурджээ.

Тус улсын засгийн газраас электрон тамхины хязгаарлалтыг улам чангалсаар байгаа ба 2026 оноос эхлэн шинээр электрон тамхины үйлдвэр барихыг хязгаарласан байна.