Манай улсын мал сүргийн тоо сүүлийн жилүүдэд тогтвортой өсөж, 2021 оны жилийн эцэст 67.3 сая толгойд хүрч, мал аж ахуйн гаралтай түүхий эд, бүтээгдэхүүний гарц нэмэгдэж байгаа ч бэлчээрийн боломжит даацаас 2.5 дахин хэтэрсэн. Мөн бэлчээрийн ачааллыг 33 хувиар нэмэгдүүлэн бэлчээр, тэжээлийн хүрэлцээ, усны хомстол үүсэж байгаа нь цөлжилт эрчимжих, улмаар малын ашиг шим, бүтээгдэхүүний гарц буурахад сөргөөр нөлөөлөх шалтгаан болж буй. 

Иймээс сүргийн бүтцийг тэнцвэржүүлж, бэлчээрийн даацыг нэмэгдүүлэх зорилгоор Улсын Их хурлын 2020 оны нэгдсэн хуралдаанаар Малын тоо толгойн албан татварын тухай хуулийг баталсан. Уг хуулиар нэг малд ногдох албан татварын хэмжээ 0-2000 төгрөг байна гэж заасан байдаг.

2021 онд 246 мянга гаруй малчин татвар төлөх ёстойгоос 145 мянга гаруй малчин татвар төлсөн тайлангаа ирүүлсэн байна. Ингэснээр төсөвт 15.2 тэрбум төгрөг төвлөрчээ. Харин 2022 оны байдлаар 60.8 мянга гаруй малчин татвар төлсөн тайлангаа ирүүлж төсөвт 6 тэрбум төгрөгийн татвар төвлөрчээ.

Хууль хэрэгжсэн жил гаруйн хугацаанд нийтдээ 20 гаруй тэрбум төгрөгийн татвар төвлөрүүлжээ. Хуулийн дагуу татвар төлөх шаардлагатай малчдын 50 гаруй хувь нь малын тоо толгойн албан татвар төлж байгаа бөгөөд малын тоо толгойноос хамааран ногдох татварын хэмжээг сум, дүүргийн иргэдийн төлөөлөгчдийн хурлаас тогтоож зарцуулалтыг нь хариуцдаг.