Манай орны Тахийн тоо толгой мянга давжээ. Тахийн талаас 70 гаруй тахийн гүү унагалаад буй талаар холбогдох албаныхан мэдээллээ.
Энэ жил Монгол нутагт тахь сэргээн нутагшуулсны 30 жилийн ой тохиож байгаа юм. Тахь нь манай орны унаган зүйл хэдий ч 1960-аад оны сүүлээр байгальдаа бүрэн устсан гашуун түүхтэй.
Тахийг эх нутагт нь сэргээн нутагшуулах ажил 1992 оны 6-р сарын 5-нд эхэлж, Төв аймгийн Хустайн нуруунд анхны 16 тахь, дараа өдөр нь Говь-Алтай аймгийн Тахийн талд анхны 5 тахийг тээвэрлэн авчирсан байдаг.
2022 оны 6-р сарын байдлаар Хустайн нурууны байгалийн цогцолборт газарт 422, Говийн их дархан цаазат газрын “Б” хэсэгт 386, Хомын талын байгалийн цогцолборт газарт 132 нийт 940 толгой тахь тоологдоод байв.
Ташрамд дурдахад, Хустайн байгалийн цогцолборт газарт сэргээн нутагшуулсан, дэлхийн сүүлчийн, цор ганц зүйл зэрлэг адуу-тахь болон халиун буга, Монгол тарвага зэрэг бусад нэн ховор, ховордсон амьтдыг 24/7 цагаар өдөр ч, шөнө ч харах боломжтой камер байршуулсан.
https://www.youtube.com/watch?v=jW7ZFi014pY youtube сувгаар 24/7 дамжуулах стриймингээс ан амьтдын бэлчээрлэж буйг хүссэн үедээ ажиглах боломжтой юм.