Монгол Улсын Ерөнхийлөгч У.Хүрэлсүхийн санаачилгаар дэлхийд нэн ховор, зөвхөн Монголын говьд амьдардаг мазаалайг "Монголын үндэсний бахархалт амьтан" болгохоор боллоо.

Мазаалай нь /Ursus аrctos gobiensis/ говь цөлд амьдардаг дэлхийн цорын ганц байвгай юм. Өдгөө зөвхөн Монголын говьд л бий.  Хэдийгээр махчин амьтан боловч идэш тэжээлийнхээ 77 хувийг ургамлаас, үлдсэн 23 хувийг амьтны гаралтай бүтээгдэхүүнээс авдаг.  Говь цөлд зундаа +46 хэм хүрч халж, өвөлдөө -34 хэм хүртэл хүйтэрдэг эрс тэс газар амьдардгаараа бусад байвгайн зүйлүүдээс ялгаатай.

Мазаалайг 1920-иод оны эхээр баруун Алтайн нурууны Аж Богдод анх олж тогтоосон. 1953 онд Дархан цаазтай амьтдын тоонд оруулж агнахыг хуулиар хориглож байв. Тухайн үед тоо толгой нь 20 хүрэхгүй тоологдож байсан нь өдгөө 50 тоо толгой болж нэмэгджээ.

Мазаалай нь говь, баянбүрдийн биоценозид орон зай, идэш тэжээлийн гинжин холбоо бий болгодог экосистемийн чухал ач холбогдолтой амьтан билээ. Хөхтөн амьтдын сэг зэмээр хооллодог тул байгальд ариутгагчийн үүрэг гүйцэтгэнэ. Мөн хөрсний ус малтаж гарган хавтгай зэрэг бусад хөхтөн амьтдаа усаар хангадаг байна.