Үндэсний агаарын тээвэрлэгч МИАТ ТӨХК үүсэн байгуулагдсаны 70 жилийн ойд зориулсан дурсгалын шуудангийн маркийг "Монгол шуудан" ХК-тай хамтран бүтээж, албан ёсоор гүйлгээнд гарган нээлтийн ёслолыг зохион байгуулав.

Нээлтийн арга хэмжээнд Зам, тээврийн яамны Төрийн нарийн бичгийн дарга М.Баярмагнай, МИАТ ТӨХК-ийн Гүйцэтгэх захирал Т.Тэлмэн, "Монгол шуудан" ХК-ийн Гүйцэтгэх захирал Г.Тэлмэн болон хоёр байгууллагын удирдлага, албан хаагчид оролцлоо.

Нээлтийн үеэр Зам, тээврийн яамны Төрийн нарийн бичгийн дарга М.Баярмагнай: МИАТ ТӨХК нь Монгол Улсыг дэлхийн улс орнуудтай агаарын замаар холбож, эдийн засаг, худалдаа, аялал жуулчлал, соёлын харилцааг өргөжүүлэхэд үнэтэй хувь нэмэр оруулсаар ирсэн. Түүхт 70 жилийн ойд зориулсан энэхүү шуудангийн марк нь үндэсний агаарын тээврийн хөгжлийг мөнхлөн үлдээх онцгой ач холбогдолтой бүтээл болж байна. Энэхүү ажлыг хамтран хэрэгжүүлсэн "Монгол шуудан" ХК-ийн хамт олонд талархал илэрхийлье" хэмээн онцоллоо.

МИАТ ТӨХК-ийн Гүйцэтгэх захирал Т.Тэлмэн хэлэхдээ: Шуудангийн маркт МИАТ ТӨХК-ийн албан ёсны лого болон тэнгэрт дүүлэн нисэж буй Boeing 787-9 Dreamliner агаарын хөлгийг дүрсэлсэн. Энэ нь Монгол Улсыг дэлхийн улс орнуудтай холбох бидний эрхэм зорилго, хөгжлийн бэлгэдэл юм. Манай компани 2023 оноос Boeing 787-9 Dreamliner агаарын хөлгийг үйл ажиллагаандаа нэвтрүүлснээр олон улсын жишигт нийцсэн үйлчилгээ, технологийн шинэчлэлийн шинэ үеийг эхлүүлсэн." гэв.

"Монгол шуудан" ХК-ийн Гүйцэтгэх захирал Г.Тэлмэн баярын мэндчилгээ дэвшүүлэхдээ: Монгол Улсад иргэний агаарын тээврийн салбар үүсэж хөгжсөний 70 жилийн ой тохиож байна. МИАТ ТӨХК болон "Монгол шуудан" ХК нь төрийн өмнө хүлээсэн хариуцлагатай үүргээ нэр төртэй биелүүлж ирсэн байгууллагууд. Энэхүү түүхэн ойд зориулсан шуудангийн маркийг хамтран бүтээсэндээ баяртай байна." хэмээн хэллээ.

МИАТ ТӨХК-ийн 70 жилийн ойд зориулсан энэхүү дурсгалын шуудангийн марк нь үндэсний иргэний агаарын тээврийн хөгжил, Монгол Улсыг дэлхийтэй холбосон түүхэн замнал, амжилт бүтээлийг мөнхлөн үлдээсэн филателийн үнэ цэнтэй бүтээл болж, цуглуулагчид болон олон нийтэд хүрч байна.