Гадаад дотоодын жуулчдад зориулж ховор, нэн ховордсон амьтан, ургамлын талаарх мэдээллийг агуулсан Монголын биологийн олон янз байдлын "байгаль/baigali/" аппликэйшнг хэрэглээнд нэвтрүүллээ.
“BAIGALI“ аппликейшнээр Монгол орны 3000 орчим зүйл ховор, нэн ховордсон амьтан, ургамлын, зураг, ажиглалтын явц, газар зүйн байршил, цаг хугацааны мэдээллийг авах боломжтой аж. Монгол хэл дээр системчлэгдсэн тус аппликейшинг хэрэглэгчид үнэ төлбөргүй утсандаа татаж, ашиглахаас гадна нэмэлт мэдээлэл байршуулж, баяжуулах боломжтой.
Нээлтийн арга хэмжээнд Байгаль орчин, аялал жуулчлалын сайд Б.Бат-Эрдэнэ хэлэхдээ: “Манай улсын аялал жуулчлалын 80 гаруй хувь нь улсын тусгай хамгаалалттай газар нутгийн байгальд аялж, түүнийг мэдэрч, таашаал авахад оршдог. Жуулчид онгон дагшин, унаган байгалийн үзэсгэлэнт газрууд, бүрэн бүтнээрээ байгаа биологийн олон янз байдал, аж ахуйг тогтвортой хөгжүүлэх, нүүдэлчдийн соёлыг мэдрэхийн тулд Монгол орныг зорин ирдэг. Гадаадын ихэнх жуулчид аялах чиглэлээ шийдэхээсээ өмнө зөвхөн санал болгож буй үйлчилгээний талаар төдийгүй, байгалийн тухай мэдээлэл авахын тулд интернэтийг голчлон ашигладаг. Энэ нь бид өөрсдийн ажиглалтаа аппликэйшн болон веб сайт дээрээ хэдий чинээ их хуваалцана, төдий чинээ олон улсад Монгол орны үзэмж төгс байгаль, ховор ан амьтан, ургамалыг сурталчилж, аялал жуулчлалын шинэ бүтээгдэхүүнийг санал болгох боломж бодитоор нэмэгдэж байна гэсэн үг юм. Тиймээс Монгол улсын биологийн олон янз байдлыг илэрхийлэх “BAIGALI“ аппликейшныг аялал жуулчлалын салбарын маркетингийн чухал хэрэгсэл болгох цаашлаад хүн бүрийн хэрэглээнд нэвтрүүлэхийг зорьж байна" гэлээ.
“BAIGALI“ аппликэйшн нь биологийн олон янз байдлыг хамгаалахад зориулж хөрөнгө босгох хэрэгсэл болж, төсвийн мөнгө хүрэлцэхгүй байгаа газарт тусламж болох үр ашигтай гэдгийг мөн онцлов.