Монгол Улс Цөлжилттэй тэмцэх тухай Нэгдсэн Үндэстний Байгууллага (НҮБ)-ын Конвенцын 17 дугаар бага хурал (СОР17)-ыг 2026 онд эх орондоо хүлээн авч зохион байгуулах тухай “Хүлээн авагч улсын хэлэлцээр”-т Байгаль орчин, уур амьсгалын өөрчлөлтийн сайд С.Одонтуяа, Цөлжилттэй тэмцэх тухай Конвенцын Гүйцэтгэх Нарийн бичгийн дарга Ибрахим Тио нар гарын үсэг зурав.
Цөлжилттэй тэмцэх тухай Нэгдсэн Үндэстний Байгууллага (НҮБ)-ын Конвенцын 17 дугаар бага хурал (СОР17)-д 197 улсын Засгийн газар, хувийн хэвшил, иргэний нийгэм, уугуул иргэдийн төлөөлөл оролцож, газар хөрсийг сэргээх, тогтвортой эзэмших, ган, цөлжилтийг бууруулах чиглэлээр санал солилцоно.
Монгол Улс анх удаа дэлхийн 197 орны төлөөллийг хамарсан олон улсын хурлыг эх орондоо хүлээн авч зохион байгуулснаар цөлжилт, газрын доройтолтой тэмцэж, ган гачиг, шар шороон шуурга зэрэг байгалийн гамшгийг сөрөх чадварыг хөгжүүлэх чиглэлд олон улсын тавцан дээр манлайлал үзүүлэх боломжтой. Монгол Улсын нийт газар нутгийн 76,9 хувь нь цөлжилтөд автсан байгаа тул олон улсын хамтын нийгэмлэгийг хуран цуглуулж, инновац, технологийн дэвшил шингэсэн шийдлийг хайж, газар хөрсөөр тэтгэгддэг иргэдийн амьжиргааг дээшлүүлэх замаар уур амьсгалын өөрчлөлтийн сөрөг нөлөөг бууруулахад хувь нэмэр оруулах зорилготой.
СОР17 бага хурал нь Монгол Улсын санаачилга, манлайллаар НҮБ-ын Ерөнхий Ассамблейн тогтоолоор зарласан “Бэлчээр ба нүүдлийн аж ахуй эрхлэгчдийн олон улсын жил”-тэй давхцаж байгаа нь учиртай. Төв Ази, Монголын бэлчээрийн 60 гаруй хувь доройтсон бөгөөд бэлчээрийн мал аж ахуй нь тус бүс нутгийн ард түмний гуравны нэг, дэлхийн хагас тэрбум хүмүүсийн амьжиргааг тэтгэж, хүнсний аюулгүй байдлыг хангадаг юм.
Хэлэлцээрт гарын үсэг зурахын өмнө талууд хэвлэлд мэдээлэл хийх үеэр Байгаль орчин, уур амьсгалын өөрчлөлтийн сайд С.Одонтуяа “Монгол Улс цөлжилт, газрын доройтолтой тэмцэхэд чухал ач холбогдол өгч байгаа. Монгол Улсын Ерөнхийлөгчийн санаачилсан “Тэрбум мод” үндэсний хөдөлгөөний хүрээнд байгаль орчноо хамгаалж,ирээдүй хойч үедээ тогтвортой байгалийг өвлүүлэхийг зорьж байна” гэв.
Цөлжилттэй тэмцэх тухай Нэгдсэн Үндэстний Байгууллага (НҮБ)-ын Конвенцын Гүйцэтгэх нарийн бичгийн дарга Ибрахим Тио хэлсэн үгэндээ “Цөлжилт, гангийн асуудлыг нэн даруй шийдвэрлэхэд дэлхийн хамтын нийгэмлэг хүч чармайлт гаргах шаардлагатай. Монгол Улсад болох СОР17 бага хурал нь Саудын Арабын Хаант Улсад болсон СОР16 бага хурлын үр дүнг бататгаж, олон улсын санхүүжилтийг нэмэгдүүлж, салбар хоорондын хамтын ажиллагааг хөхиүлэн дэмжих болно” гэв.
