Энэ жилийн “Сэтгэцийн эрүүл мэндийн дэлхийн өдөр”-өөр сэтгэцийн эрүүл мэнд буюу сэтгэлзүйн сайн сайхныг нийгмийн эрүүл мэндийн тэргүүлэх зорилго болгохыг уриалж буй.
Манай улс Эрүүл мэндийн салбарын төсвөөс 2 хувийг нь л Сэтгэцийн эрүүл мэндийн салбартаа зарцуулдаг. Маш бага хувь. Гэтэл сэтгэцийн эрүүл мэндийн асуудал илүү чухлаар тавигдах ёстой. Нийгмийн сэтгэцийн эрүүл мэндэд зохих хөрөнгө оруулахгүйгээр тогтвортой хөгжлийн зорилго 3 буюу бүх нийтийн Эрүүл мэндийг дэмжих зорилгод хүрэх боломжгүй.
2021 онд манай улсын хэмжээнд сэтгэцийн эрүүл мэнд ямар байсан талаарх зарим статистик үзүүлэлттэй танилцана уу.
Улсын хэмжээнд сэтгэцийн эрүүл мэндийн чиглэлээр ажиллаж буй нийт 174 мэргэшсэн их эмч байгаагаас 80 нь төрөлжсөн мэргэжлийн эмнэлэгт, 40 нь аймаг дүүргийн эрүүл мэндийн төвд ажиллаж байна.
2021 онд Сэтгэцийн эмгэгийн амбулаторид бүртгэгдсэн өвчлөлөөр нь авч үзвэл,
- Оюуны хомсдол - 14.822 буюу 52.2 хувийг,
- Сэтгэцийн органик ба шинж тэмдгийн эмгэг - 3874 буюу 15.2 хувийг,
- Шизофрени, шизофрений хэв шинжит ба дэмийрэх эмгэг - 3198 буюу 12.6 хувь буюу хамгийн их хувийг эзэлж байна.
Энэ нь 2016 он буюу 5 жилийн өмнөхтэй харьцуулахад "Оюуны хомсдол" өвчин 24 хувиар эрс нэмэгдсэн үзүүлэлттэй байгаа юм.
Оюуны хомсдолтой хүүхэд төрөх олон шалтгаан бий. Дотоод шалтгаан, гадаад шалтгаан, дотоод гадаад хавсарсан гэх мэт. Дотоод шалтгаан гэдэгт удмын буюу генийн өвчнүүд орно. Гадаад шалтгаан нь жирэмсэн байх үедээ урагт гэмтэл учирснаас болдог. Үүнд архи, тамхины хэрэглээ, жирэмсэн үедээ хүчтэй хордлого авах, бэртэж гэмтэх зэрэг хамаардаг.