МУ-ын Ерөнхийлөгч У.Хүрэлсүхийн үүрэг, чиглэл болгосноор Хар ус нуур орчмын экосистемийг хамгаалах цогц ажил эхэлсэн талаар БОАЖЯ-аас мэдээлэв.
Уг ажлын хүрээнд Ерөнхийлөгчийн Тамгын газар, Үндэсний аюулгүй байдлын зөвлөл, БОАЖЯ, Усны газрын хамтарсан ажлын хэсэг Ховд аймагт ажиллаж байгаа аж.
Хар ус нуур орчмын экосистемийн бохирдлын шалтгаан:
- Цутгал голуудын бохирдол
- Заарт харх буюу ондатрын тоо хэмжээ хэт нэмэгдсэн нь нуурын экосистемийг алдагдуулсан
- Малаас үүдэлтэй бохирдол
- Суурин газруудын хур хогноос үүдэлтэй бохирдол
- Дөргөний усан цахилгаан станцын үйл ажиллагааны сөрөг нөлөөлөл
- Нуурын эрэг орчимд усны өвс ургамал ургаж замагшсан зэрэг хүний буруутай үйл ажиллагаанаас олон төрлийн бохирдол үүссэн байна.
Монгол Улсын 3 дахь том нуур, Их нууруудын хотгорын амин судас болсон Хар ус нуурын экосистемийг хамгаалах нь байгаль экологийн өндөр ач холбогдолтой.
Хар ус нуураас Хар нуур, Дөргөн нуур, Хяргас нуур, Айраг нуурууд хамааралтай байдаг учир энэ хамгааллын ажил зөвхөн Хар ус нуурыг хамгаалахаас гадна Монгол орны баруун бүсийн томоохон гол, нууруудыг цогцоор нь хамгаалах ажил юм.
Хар ус нуур нь манай орны 1000-аас дээш км.кав талбайтай дөрвөн нуурын нэг. Нуурын талбай бүх арлуудын хамтаар 185.920га бөгөөд өргөнөөр 25.8км, уртаар 72.2 км хэмжээтэй. Хар ус нуур хэдийгээр том талбайтай боловч маш гүехэн, цэнгэг устай нуур. Хамгийн гүн нь 4.4м, дундаж гүн нь 2м хүрдэг. Энд 200 гаруй зүйлийн нүүдлийн шувууд өндөглөн зусдаг нь бүс нутгийг хамгаалах олон улсын ач холбогдлыг нэмэгдүүлдэг.
