Хүнсний худалдааны чиглэлээр ажиллаж буй газруудад хүнсний түүхий эд, бүтээгдэхүүнийг жижиглэн савлахдаа дагалдах шошгын мэдээллийн шаардлагыг хангуулж хэрэглэгчдэд хүргэх, хүүхдийн бэлгэнд шинжилгээ баталгаажилттай, сав баглаа боодлын бүрэн бүтэн байдал алдагдаагүй, хаяг, шошгын мэдээлэл шаардлага хангасан, сахарын орц бага бүтээгдэхүүн сонгохыг мэргэжлийн байгууллагаас анхааруулав.  

Хүүхдийн сахарын өдрийн зөвлөмж хэмжээ нь 2-18 насанд 20-25г байдаг. Энэ нь 6 цайны халбагаас хэтрэхгүй байх ёстой юм. Нэг уут бэлгэнд дунджаар 200-400 г сахар агуулагдаж байдаг тул хүүхдийн бэлгэнд зориулж амттан худалдаж авахдаа эрүүл хүнс сонгоорой.

Иргэд та бүхэн баярын өдөр хүүхдэдээ бэлэг сонгохдоо дараах зөвлөмжийг дагана уу. 

1. Тасалгааны температур нь бичил биетэн үржих таатай нөхцөл болдог тул баярын үеэр их хэмжээгээр бэлдсэн хоол, салат, зуушыг тасалгааны хэмд хадгалахаас зайлсхийж, хөргүүрт зөв хадгалан хэрэглэх;
2. Багцалж боосон хүүхдийн бэлгэнд орсон бүтээгдэхүүн нэг бүрийн хаяг шошго, сав баглаа боодлын бүрэн бүтэн байдал, хадгалалтын хугацааг нягталж, сахарын агууламж багатай хүнсний бүтээгдэхүүнийг сонгох;
3. Ил задгай болон гар дээрээс бохирлогдсон гэмтсэн хүнсний түүхий эд, бүтээгдэхүүнийг худалдан авахгүй байх;
4. Цахим сүлжээний худалдаанаас гарал үүсэл нь тодорхойгүй хүнсний түүхий эд, бүтээгдэхүүн, согтууруулах ундаа худалдан авахгүй байхыг зөвлөж байна.