"Форбес" сэтгүүлээс шалгаруулдаг дэлхийн хамгийн нөлөө бүхий эмэгтэйчүүдийн жагсаалтыг ХБНГУ-ын канцлер Ангела Мэркэл нийт долоон удаа тэргүүлсэн юм. Германы канцлер асан Хелмут Кольд үнэлэгдэн Эмэгтэйчүүд, залуучуудын асуудал эрхлэх яамыг тэргүүлж, 37 насандаа анх их улс төрд хөл тавьсан түүнийг хамгийн нууцлаг эмэгтэйчүүдийн тоонд зүй ёсоор багтаадаг билээ.

Олон улсын хэмжээнд байр сууриа жилээс жилд ахиулсаар эрэгтэй улс төрчидтэй эн зэрэгцэн “дайтаж” яваа  61 настай энэ эмэгтэйн тухай Штэфан Корнэлиүсийн бичсэн  “Ангэла Мэркэл” хэмээх бүтээл Д.Моононцагааны орчуулгаар монгол уншигчдын  хүртээл болсон юм.  Бүс нутагтаа төдийгүй даян дэлхийд тэргүүлж яваа физикч эмэгтэйн амжилтын нууцын нэгэн хэсэг болох хувь чанарын тухайд дээрх номоос товч тоймлон хүргэе.

Хүүхэд насандаа аз жаргалаар дүүрэн өссөн санваартны охин тэрээр аливаа сайн муугийн хэм хэмжээг сайтар ухамсарладгаас гадна бусадтай тун эвсэг байдаг нь түүнд олон боломжуудыг авчирсан гэдэг. Оньсого мэт учир битүүлэг, ажилсан, шаргуу Мэркэл бусдын сүүдэрт явж өөрийн нэр сүрийг бүдгэрүүлэхийг огтоос хүсдэггүй нь өнөөдрийн их өндөрлөгт хүрэхэд нь ихээхэн нөлөөлсөн тухай түүний тухай хөрөг нийтлэлүүдэд онцолсон байдаг.

Хахир хатуу мэт төрхтэй ч хошигнох чадвар сайтайгаараа хүмүүсийг өөртөө татдагаас гадна ихэрхэх, бусдыг дорд үзэх , дуугаа өндөрсгөх, гөжүүн авирлах зан түүнд үгүй.  Францын ерөнхийлөгч асан Никола Саркози нарынх шиг ихэрхэг, омгорхог занг үзэн яддаг гэнэ.

Мэркэл гадаад дүр төрхийг нь шүүмжилсэн яриа хөөрөө хов живийг олон жилийн турш тэсэн өнгөрөөж, өнгөн талын хэрэгтэй хэрэггүй юмыг хайхралгүй, дэмий юм хөөцөлдөлгүйгээр сайн сайхан үйл бүтээж болдог гэдгийг нотлохыг зорьжээ. Эцэстээ тэрээр олон жилийн хойно, олон ярилцлагын дараа бууж өгөөд өөрийгөө зохих ёсоор харуулах явдал бол бас л нэгэн ажил юм гэдгийг чимээгүйхэн хүлээн зөвшөөрсөн гэдэг.  Түүний Засгийн газрын анхны хэвлэлийн төлөөлөгч Үли Вилхэлм  зураглаачийн дурангаар эвтэйхэн гарахын тулд юу анхаарахыг түүнд зааж өгсөн байна. Ийнхүү хэвлэлийн баг нь нь канцлерын эерэг дүр төрхийг олон нийтэд хүргэхэд анхаардаг болжээ.

 Харилцан буулт хийж зөвшилцөлд хүрэх боломж л байвал маш уян хатан ажиллаж чаддаг, эвээр хөтлөх арга барилаараа онцын зөрчил маргаангүйгээр үр дүнд хүрэхийг эрхэмлэдэг Мэркэлийн гойд сайн чаддаг зүйл нь дуугүй байх явдал гэж намтар судлаачид дүгнэсэн байдаг. “Дуугүй, чив чимээгүй байна гэдэг бол миний хувьд нэг тийм маш сайхан зүйл байгаа юм” гэж Мэркэл ярьсан удаатай. Түүний энэ буйд амгалан ертөнцийн төвд улс орны шилдэг квантын химичдийн нэг, дэлхийд нэрд гарсан, түүний нөхөр Йоахим Зауэр нь байдаг...

Гэрэл зургийг: telegraph.co.uk