Баянзүрх дүүргийн 29 дүгээр хороо Сэлбэ голын дагуу мөсний халиа үүсэж, тухайн орчинд амьдардаг 13 айл өрхийн хашаа руу хальж мөстсөн байна. Иймд дүүргийн Онцгой комиссоос шаардлагатай арга хэмжээг авч хэрэгжүүлжээ. Мөн Онцгой байдлын хэлтэс, Геодези Усны Барилга Байгууламж ОНӨААҮГ хамтран ажиллаж, мөсний халианы улмаас ус орж болзошгүй айлуудын хашаанд тулгаж шороон далан босгож, иргэдийн аюулгүй байдлыг хангаж ажиллажээ.

Улаанбаатар хотын ерөнхий менежерийн тушаалаар энэ асуудлыг хариуцахаар томилогдсон ажлын хэсэг дүүргүүдийн нутаг дэвсгэрт инженерийн шугам сүлжээний ашиглалтын нөхцөл байдалд үзлэг шалгалтыг зохион байгуулж байгаа юм. Үзлэг шалгалтаар халиа дошин, хаврын шар усны үерээс урьдчилан сэргийлэх, ус зайлуулах шугам сүлжээний хэвийн ажиллагааг хангах арга хэмжээг авч, үүссэн нөхцөл байдлыг арилгах шуурхай зохион байгуулалтын арга хэмжээг хэрэгжүүлж байгаагэж нийслэлийн Онцгой байдлын газраас мэдээллээ.

Түүнчлэн иргэдийг жалга, сайр, булаг шанд, гол горхины орчимд болон үерийн хамгаалалтын далан, сувагт оршин суухгүй байхыг ГУББГ-аас анхаарууллаа. Улаанбаатар хотын хэмжээнд нийт 50 байршилд халиа тошин үүсдэг. Үүнээс 10-20 байршилд халиа тошин тогтмол идэвхтэй байдаг байна. Эдгээр байршилд одоогоор 2,100 орчим айл амьдардаг.