СХД-ийн Нэгдсэн эмнэлэг нийт ажилчдынхаа нийгмийн асуудлын хүрээнд 1.4 сая төгрөгийн нэг удаагийн тэтгэмж олгож "Улаан бүс”-д ажиллаж байгаа эмч нар болон яаралтай тусламж, хүлээн авах тасгийн эмч нарын цалинг 15 хувиар нэмэгдүүлжээ.Цаашдаа ч нийт ажилчдынхаа цалинг шат дараатай нэмэх бодлоготой ажиллаж байгаа гэлээ.
Тус эмнэлгийн Эрүүл мэндийн тусламж үйлчилгээ чанар, аюулгүй байдлын албаны дарга Д.Зулаа хэлэхдээ, "Коронавируст халдварын тусламжийн хажуугаар манай эмнэлэг үндсэн тусламж үйлчилгээг иргэдэд үзүүлсээр байгаа. Ингэхдээ хүлээгдэл чирэгдэл үүсгэхгүй байх, ор хоногийн эргэлтийг сайжруулах зорилгоор өдрийн эмчилгээг нээсэн. Өдрийн эмчилгээнд, мэдрэл, сэргээн засах, уламжлалт эмчилгээ болон мэс заслын эмчилгээ багтаж байна. Мөн СХД-ийн хэмжээнд анх удаа манай эмнэлэг өндөр давтамжит радио долгионоор хавдрын түлэх эмчилгээ болон хамрын уян дуранг нэвтрүүлэн ажиллаж байна" гэв.
СХД-ийн нэгдсэн эмнэлэг нь Эрүүл мэндийн сайдын тушаалаар "КОВИД-19"-ийн 200 ор дэлгэн ажиллаж байна. Үүнээс 20 нь эрчимт эмчилгээнийх бол 180 нь энгийн ор аж. Өнөөдрийн байдлаар СХД-ийн хэмжээнд хэвтсэн нийт 8142 иргэний 3793-д коронавируст халдварын үеийн эмнэлгийн тусламж үзүүлжээ.