Замын хөдөлгөөний аюулгүй байдлын Үндэсний зөвлөл өнөөдөр хуралдаж 2023 оны үйл ажиллагааны төлөвлөгөөгөө хэлэлцэн баталжээ. 

Төлөвлөгөөнд,

• Жолооч бэлтгэх тогтолцоог сайжруулж, үр дүнд хүргэх, төр, хувийн хэвшлийн уялдаа холбоог сайжруулах, эрхзүйн орчныг боловсронгуй болгох,
• Орон нутгийн замд шалган нэвтрүүлэх 64 товчоо байгаагаас 13 нь камерын хяналттай байна. Энэ онд шинээр 12 цэгийг бүрэн камержуулна. Камержуулах нь дан ганц торгох шийтгэх биш жолооч нарыг хурд хэтрүүлэхгүй байлгаж, ослоос урьдчилан сэргийлэх нөлөөллийн үр дүнтэй байна. Цаашид бүх шалган нэвтрүүлэх товчоонуудыг иж бүрэн камержуулах шаардлагатай байгаа.
• Согтууруулах ундаа хэрэглэсэн үедээ автомашин жолоодсон бол хууль эрх зүйн орчныг чангатгах,
• Ерөнхий боловсролын хичээлийн сургалтын агуулга дахь замын хөдөлгөөний мэдлэгийг боловсронгуй болгож, зөв, цэгцтэй мэдээлэл олгох,
• Зам, тээврийн ослын талаарх тоон үзүүлэлт, төрөлжсөн мэдээллийн нэгдсэн сантай болох зэрэг ажлууд тусгагдсан байна.

Сүүлийн таван жилд 25 мянга орчим зам, тээврийн осол бүртгэгдэж, 284 хүүхэд нас барсан статистик байна. Зам, тээврийн осол гэмтлийг бууруулахын тулд эрх зүйн орчныг сайжруулах, хуулийн хэрэгжилтийг хангуулах хэрэгтэйг тодотгов.

Мөн салбар хоорондын уялдаа, хамтын ажиллагааг өргөжүүлж, хүүхдүүдэд бага наснаас нь эхлэн замын хөдөлгөөнд аюулгүй, соёлтой оролцох мэдлэгийг зөв олгох нь чухал. Замын хөдөлгөөний аюулгүй байдлын талаарх мэдлэгийг хүүхдүүдэд цэцэрлэгээс эхлэн олгох хэрэгтэй. Сургалтын хөтөлбөрийн агуулгадаа ойлгомжтой, цэгцтэй оруулж, үр дүн гаргах хэрэгтэйг ЗТХ-ийн сайд хэллээ.