"Эрдмийн чуулган-2025" 9 дэх удаагийн эрдэм шинжилгээний хурал ТТАХНЭ дээр өнөөдөл болсон. Тус эмнэлгийн Мэдрэлийн төвийн  их эмч М.Гантуяа "Хууль зүй, дотоод хэргийн яамны харьяа байгууллагуудын албан хаагчдын тархины харвалтын эрсдэлийг судалсан дүн" сэдэвт эмнэлзүйн өгүүллийг танилцуулсан. 

ДЭМБ-ын мэдээгээр жил бүр дэлхийн хэмжээнд 12 сая хүн тархины харвалтаар өвчилж, тэдгээрийн 7 сая нь нас бардаг гэх мэдээлэл байдаг.

ТТАХНЭ-ийн Мэдрэлийн төв, харвалтын нэгж нь 2021 онд байгуулагдсан. Үүнээс хойш хэвтэж эмчлүүлсэн тархины харвалт оноштой хүмүүсийн 42.8 хувь нь хөдөлмөрийн насны буюу ажил үүргээ гүйцэтгэж байгаа албан хаагчид байсан. Тиймээс алба хаагчдын дунд тархины харвалтын эрсдэлт хүчин зүйлсийг тодорхойлох, суурь эмгэгийг эмчлэн, харвалтаас урган гарах нас баралт, хөдөлмөрийн чадвар алдалтаас сэргийлэх хэрэгцээ байгаа нь уг судалгааг хийх үндэслэл болсон байна. 

Хууль зүй дотоод хэргийн сайдын санаачилсан “Хамгийн чухал нь” зорилтод арга хэмжээний хүрээнд Монгол Улсын 21 аймгийн үйлчлэх хүрээний алба хаагчдын дунд урьдчилан сэргийлэх, эрт илрүүлгийн аяныг өрнүүлж байгаа. Үүнийг түшиглэж асуумж судалгааны аргаар эрсдэлт хүчин зүйлсийг тодорхойлж үр дүнгээ гаргасан. 21 аймгийг хамруулсан тархины харвалтаар өвдөөгүй байхад нь эрсдэлийг тодорхойлсон судалгаа одоогоор хомс байдаг. Тиймээс энэ судалгаа өндөр ач холбогдолтой гэж үзэж байгаа гэсэн юм. 

Олон улсын судалгааны үр дүнгээс харахад залуу насны хүмүүст тархины харвалт тохиолдох эрсдэлт хүчин зүйлс нь ихэнхдээ судасны гаж хөгжил, зүрхний эмгэг, цус бүлэгнэлтийн эмгэг зэрэг байдаг бол бидний судалгаагаар, даралт ихсэлттэй байх, зүрхний эмгэгтэй, тамхины хэрэглээ өндөр байх нь тархины харвалтад нөлөөлж байна гэж гарсан.

Тархины харвалтын эрсдэл өндөр хувьтай байгаа тул хүн амд чиглэсэн эрт илрүүлгийг тогтмол явуулах, эрүүл мэндийн боловсрол олгох, эрсдэлт хүчин зүйлсийг эрт илрүүлж эмчлэх, ялангуяа цусны даралт ихсэлтийн хяналтыг сайжруулах хэрэгтэйг онцлов. 

Залуучууд цусны даралт ихсэлттэй гэдгээ мэддэггүй, тогтмол хянадаггүй байдал байна. Тиймээс эрсдэлтэй бус насны залуус сардаа нэг удаа даралтаа хянах хэрэгтэй. Хэмжилтээр 130/80-аас дээш байвал даралт ихсэлттэй гэж үздэг. Даралт ихсэлттэй байвал тогтмол хянаж, хэмжиж, эмчийн үзлэг зөвлөгөөний дагуу даралтны эм уух шаардлагатай" гэдгийг зөвлөлөө.