Жил бүрийн 5 дугаар сарын 31-ний өдрийг дэлхий нийтээрээ “Дэлхийн тамхигүй өдөр” болгон тэмдэглэн өнгөрүүлдэг уламжлалтай. Энэ жил “Тамхины эсрэг өдөр – Таны нэгдэх өдөр” уриан дор Үндэсний цэцэрлэгт хүрээлэнд тамхины хэрэглээнээс урьдчилан сэргийлэх, олон нийтийн мэдлэг ойлголтыг нэмэгдүүлэх зорилготой нийгмийн арт хөдөлгөөнийг зохион байгууллаа.

Судалгаанаас дурдахад: 

• Монгол Улсын 15-69 насны хүн амын 5 хүн тутмын 1 нь тамхи татаж, 10 хүн тутмын 3 нь дам тамхидалтад өртөж байна. 
• Тамхи татдаг хүн өдөрт 40 минут, жилд 20 өдрийг тамхи татахад зориулдаг. 
• Тамхи татдаг хүн орлогынхоо 10-12 хувийг тамхи худалдан авахад зарцуулдаг. 
• Уушгины хавдрын 90 хувь нь тамхинаас үүдэлтэй. Уушгины хавдартай 10 хүн тутмын 9 нь тамхи татдаг байна. 
• ЕБС-ийн 13-17 насныхны 24.8 хувь нь буюу 4 суралцагч тутмын нэг нь сүүлийн нэг сард электрон тамхи хэрэглэж, 10 суралцагч тутмын 1 нь янжуур тамхи татсан байна.

Тамхины хэрэглээнээс үүдэлтэй эрүүл мэнд, нийгэм, эдийн засгийн сөрөг үр дагаврыг бууруулахад Тамхины хяналтын тухай хуулийн нэмэлт, өөрчлөлтийг батлан хэрэгжүүлэх нь чухал ач холбогдолтойг онцолж, хүүхэд, өсвөр үеийнхнийг электрон тамхи болон никотин агуулсан шинэ төрлийн бүтээгдэхүүний сурталчилгаа, нөлөөллөөс хамгаалахын тулд эрх зүйн орчныг улам боловсронгуй болгох шаардлагатай байгааг онцлон дурдлаа.

Арга хэмжээний нээлтэд Улсын Их Хурлын гишүүн Ж.Чинбүрэн, О.Номинчимэг, Эрүүл мэндийн яамны Төрийн нарийн бичгийн дарга Н.Эрдэнэбаяр, мөн ДЭМБ-ын Монгол дахь Суурин төлөөлөгчийн газрын хөтөлбөр болон захиргааны үйл ажиллагаа хариуцсан ажилтан, Суурин төлөөлөгчийн үүргийг түр орлон гүйцэтгэгч ноён Дийпак Шарма нар оролцов.