Өнөөдөр “Дэлхийн нойрны өдөр” тохиож байна. Энэ өдрийг Дэлхийн нойрны нийгэмлэгээс олон нийтийн эрүүл мэндийг сайжруулах, амьдралын зөв дадлыг хэвшүүлэх зорилгоор 14 дэх жилдээ зохион байгуулж байна.
Цар тахал, хөл хорионы улмаас дэлхий даяар нойрны асуудалтай хүмүүсийн хувь 38 болж өссөн. Өөрөөр хэлбэл гурван хүн тутмын нэг нь нойргүйдэлтэй байгаа судалгаа гарсан. Мөн сэтгэл зүйн асуудалд өртөж, нойрны асуудал үүсэж байгаа ба нойрны үргэлжлэх хугацаа багасах, нойр ханахгүй байх, нойр хүрэхгүй байх, шөнөдөө хэд хэдэн удаа сэрж нойр хулжих эмнэлзүйн шинж тэмдгүүд илэрч байгааг мэргэжлийн хүмүүс хэлж байна.
Олон удаагийн нойргүйдэл хуримтлагдвал сэтгэл санааны хямралд орно. Мөн чихрийн шижин өвчин, артерийн даралт ихсэх өвчин, харшил зэрэг маш олон бие махбодын өвчнүүдийг үүсгэдэг.
Тиймээс нойрны үнэ цэнийг ойлгож биологийн цагаараа унтаж, чанартай нойр авах нь сэтгэл санаа, ажлын бүтээмж, биеийн дархлааг дээшлүүлэх чухал ач холбогдолтой юм.
Амжилт бүтээлийн оргилд хүрэхийн тулд нойрыг хасах биш, харин дэмийн цаг өнгөрүүлэх, сошиалд хэт их цаг зарцуулахаа багасгаарай. Унтах цагтаа тултал нь нойроо авч, хийх цагтаа тултал нь ажилла. Чухал арга хэмжээнүүдээ төлөвлөдөг шиг нойроо бас төлөвлөж сураарай.
Та нойргүйдлийг хэрхэн даван туулах талаар ярилцлагыг ЭНД ДАРЖ уншаарай.