Зүрх судасны өвчлөлийг бууруулах Швейцарийн хөтөлбөрт Оном сан шалгарчээ

Эрүүл мэнд, боловсролын салбарт эерэг өөрчлөлт авчирахаар зорьж, бодит ажлууд санаачлан үр дүнд хүрч буй Оном сан нэгэн шинэ төсөл эхлүүлжээ.

Монгол хүний нас баралтын үндсэн шалтгаан болсон зүрх судасны өвчлөл, тэр дундаа артерийн даралт ихдэлтийн эсрэг  “Эрүүл зүрх-Эрүүл Улаанбаатар” хөтөлбөр тун удахгүй хэрэгжиж эхэлнэ.  Уг хөтөлбөрийг Швейцарийн Новартис сангийн тусламжтайгаар хэрэгжүүлэх юм. Тус сан уг хөтөлбөрөө дэлхийн гурван улсыг сонгон авч хэрэгжүүлж байгаагийн нэгээр манай улс шалгарсан байна.

 Эрүүл мэндийн салбарт Оном сангийн санаачлан боловсруулсан “Элэг бүтэн Монгол” хөтөлбөр улсын хэмжээнд хэрэгжиж, элэгний вирүсийн асуудлыг хурцаар хөндөж тавьж, дэлхий нийтийн анхаарлыг Монголд татаж чадсаныг Новартис сан үнэлэн, манай улсыг шинэ хөтөлбөртөө сонгосон байна.

“Эрүүл зүрх-Эрүүл Улаанбаатар” хөтөлбөр нь нийслэлийн нийт өрхийн эмнэлгүүдээр дамжуулан иргэдийн дундах артерийн даралт ихдэлтийн хяналтыг сайжруулах, эмч мэргэжилтнийг чадавхижуулах, иргэдийг урьдчилан сэргийлэх чиглэлд голчлон ажиллах юм байна.