Цөлжилт, шар шороон шуурганд хамгийн ихээр өртсөн бүс нутгуудын нэг болох Төв аймгийн Баянхангай суманд цөлжилтийг сааруулах зорилгоор "Атар хамтын төгөл" ойжуулалтын төсөл 5 дахь жилдээ амжилттай үргэлжилж байна.
"Ногоон Ази сүлжээ" ТББ-аас тус суманд 100 га ойжуулалтын талбай байгуулсан бөгөөд жил бүр бүх нийтийн мод тарих өдрүүдэд нутгийн иргэд, төрийн албан хаагчид, хүүхэд залуус төгөлдөө мод тарьдаг уламжлал тогтжээ. Энэ удаад сумын албан хаагчид, ойжуулалтын талбайн ажилтнууд хамтран 500 мод тарилаа.
“Атар хамтын төгөл”-д таван жилийн хугацаанд шар хуайс, улиас, хайлаас, нарс, голт бор зэрэг Монгол орны цөлжилттэй бүс нутагт хамгийн тэсвэртэй 70 мянга гаруй мод тариад байна.
Мөн цөлжилттэй бүс нутагт ус маш ховор, ихэнхдээ гүний худгаас усны хэрэгцээгээ хангадаг. Тэгвэл уг ойжуулалтын талбайд усны нөөцийг хамгийн үр ашигтайгаар шийдвэрлэж дуслын усалгааны системийг ашиглаж байгаа юм. Ингэснээр усаа хэмнэж, дусал бүр нь модоо услан, зөв зарцуулагдаж байгаа нь ойжуулалтын жишиг төсөл болж байна.
Одоогоор моддын ургалт 83 хувьд хүрээд байна. Энэ нь ойжуулалтын ажлын зохион байгуулалт, арчилгаа хамгаалалтын ажиллагаа тогтвортой хэрэгжиж байгаагийн тод илэрхийлэл юм.
БИЧЛЭГ ҮЗЭХ:
