“Төв цэнгэлдэх хүрээлэн” ХХК-ийг нийслэлийн өмчид 100 хувь авах тогтоолыг баталж, улсын бүртгэлийн гэрчилгээг Нийслэлийн ИТХ-ын дарга Ж.Батбаясгалан Нийслэлийн Засаг дарга бөгөөд Улаанбаатар хотын Захирагч Х.Нямбаатарт хүлээлгэн өглөө. 

Энэ үеэр Нийслэлийн Засаг дарга бөгөөд Улаанбаатар хотын Захирагч Х.Нямбаатар хэлсэн үгэндээ “Төв цэнгэлдэх хүрээлэн” ХХК-ийн хууль ёсны өвлөгчид өвлөх эрхээсээ татгалзсан. Үүнийг үндэслэн өр төлбөрт суутган тооцох хэлцэл хийн нийслэлийн өмчид авсан. Цаашид “Төв цэнгэлдэх хүрээлэн” ХХК-ийг олон нийтийн компани болгоно” гэдгийг онцлов.

Ийнхүү “Төв цэнгэлдэх хүрээлэн” ХХК-ийг  100 хувь нийслэлийн эзэмшилд аван, гүйцэтгэх захирлаар нийслэлийн Засаг даргын нийгмийн хөгжил, бүтээн байгуулалтын бодлого хариуцсан зөвлөх Ж.Энхжаргаланг томиллоо.

Тэрбээр, Нийслэлийн засаг даргаас өгсөн чиглэлийн дагуу одоо байгаа өмчийг бүрэн гүйцэт хүлээж авах, удахгүй болох төрийн их баяр наадмын бэлтгэл ажлыг өндөр түвшинд зохион байгуулах, цаашлаад жилийн 4 улирал ашиглалттай урлаг соёл спортын арга хэмжээ явдаг бүрэн автомат дээвэртэй орчин үеийн 20-30 мянган хүний суудалтай Азидаа нэр хүнд бүхий шинэ мулти цэнгэлдэх хүрээлэн байгуулах төслийг олон нийтэд танилцуулах, Монголын хөрөнгийн биржээр дамжуулан IPO гаргах бэлтгэл ажлыг хангах үүргийг хүлээж авлаа. Орчин үеийн сүпер ганц стадионтой болох бол нийт нийслэл хотын иргэдийн тэр дундаа залуучууд бидний том мөрөөдөл юм. Гадна дотны томоохон тэмцээн уралдаан урлаг соёлын томоохон тоглолт хүлээн авахад бидэнд том сав хэрэгтэй байгаа. Доороо маш том зогсоолтой маш гоё төлөвлөлт хийдэг дэлхийн шилдэг аренаагаар дагнасан зургийг компаниудад санал тавина. Богино хугацаанд хурдтай ажиллах болно" гэдгээ өөрийн цахим хуудастаа бичжээ.