Үений үрэвслүүдээс хамгийн элбэг тохиолддог, мөгөөрс болон үений зөөлөн эдүүдийг гэмтээдэг үений сөнөрөлт, давшингуй явцтай архаг өвчинг “Остеоартрит” буюу яс үений үрэвсэлт өвчин гэнэ. Үүний дотор өвдөгний үений остеоартрит голлох байр суурийг эзэлдэг.

Судалгаагаар, 40-өөс дээш насны ихэнх хүмүүс уг өвчинд нэрвэгдсэн байна. Дэлхий нийтээрээ өвдөгний үений остеоартроз буюу элэгдэл өвчин залуужиж буй талаар “Өвдөлтийн олон улсын хурлууд"-д судалгаа хийгдсэн илтгэлүүд тавигдаж байна.

Өвдөг яс үений үрэвсэлд нөлөөлөх хүчин зүйл нь таргалалт, хооллолт, гэмтэл, төрөлхийн гаж хөгжлүүд. Монгол хүмүүсийн дунд элбэг тохиолдох шалтгаан нь шим тэжээлтэй хоол хүнсээ хэрэглэхгүй байгаа явдал.

Ихэнх нь таргалалт, хооллолт зэрэг амьдралын буруу хэв маягтай холбоотой байна. Өвдөг нь биеийн жингийн ачааллын 80 хувийг дааж явдаг гол эрхтэн гэдэг утгаараа жин нэмэгдэхэд үений мөгөөрсөн жийргэвчийг дарж гэмтээж, шингэн багасах үрэвсэл үүсэх гол шалтгаан болдог.

УХТЭ-ийн Өвдөлт намдаах хэсэгт хандаж буй өвдөг нь өвдсөн хүмүүсийн бараг 80 хувь нь хүнд буюу 3,4-р шатандаа орчихсон, архаг өвдөлттэй хүмүүс байна. 40 наснаас эхлэн урьдчилан сэргийлэх зорилгоор өвдөгний рентген авхуулах хэрэгтэй. Өвдгөөр өвдөх, шажигнаж дуугарах, доошоо уруудах ялангуяа шатаар буух, уулын уруу алхахад илүүтэй өвдөх зовуурь илэрч байвал яаралтай үзүүлж зохих арга хэмжээг авах шаардлагатай.

Өвдөгний үений өвдөлт, остеоартрит өвчин түүнээс хэрхэн урьдчилан сэргийлэх, оношлогдсон бол ямар эмчилгээ хийлгэх, анхаарах зүйлсийн талаар Улсын Хоёрдугаар Төв Эмнэлгийн Мэдээгүйжүүлэг, өвдөлт намдаах тасгийн зөвлөх эмч, АУ- ны доктор  Ш.Энхтүвшинтэй хийсэн ярилцлагыг ЭНД дарж уншина уу.