“Эмийн үнийн өсөлтийн шалтгаан, нөхцөлийг хянан шалгах” үүрэг бүхий түр хорооны нотлох баримтыг шинжлэн судлах нээлттэй сонсгол Төрийн ордонд өнөөдөр (2023.04.15) эхэлсэн. Өнөөдрийн сонсголоор эмийн хүртээмжийн асуудлыг шинжлэн судалж байна. 

Сонсголын эхэнд танилцуулахдаа, Монгол Улсын эмийн бүртгэлд 2023 оны байдлаар 4213 эм бүртгэлтэй байна. Үүнээс зайлшгүй эмийн жагсаалтад 1452 эм, ЭМД-ын хөнгөлөлттэй 651 эм байна. Нийт эмийн 79 хувь нь импорт, 21 хувь нь дотоодын үйлдвэрийнх байгааг хэллээ. 

Иргэдийн төлөөлөл тулгамдаж буй асуудлуудаа 2 минутад хэлэв. 

ГЭРЧ, уналт таталттай өвчтнүүдийн төлөөлөл О.Хонгор: 

Би 27 жил энэ өвчнөөр оношлогдоод, эмчилгээ хийлгээд явж байгаа. Эмийн чанар муу байгааг хүн бүр мэдэж байгаа. Уналт таталтын эсрэг маш олон эмнүүдийг гаднаас авч уудаг. Учир нь Монгол Улсын эмийн жагсаалтад ороогүй. Гэтэл ЭМД-ын хөнгөлөлттэй эмийн жагсаалтад орчихсон. Монгол Улсын эмийн жагсаалтад ороогүй учраас Эмийн сангуудаас ЭМД-аар авах ямар ч боломжгүй гэсэн үг.  Энэ талаар ЭМЯ, ЭМДЕГ, ЭМДҮЗөвлөлд 2024 оны 2 сарын 23-нд хүсэлтээ өгсөн. Хуулийн 30 хоногийн хугацаанд хариултаа өгөх ёстой ч өнөөг хүртэл тодорхой хариу өгөөгүй байгаа. Би жишээ нь, ЭМД-д орсон болов ч, Монгол улсын эмийн жагсаалтад байхгүй уух шаардлагатай эмнүүдээ Сонлогосоос авч уудаг. Өдрийн гурваар уудаг бөгөөд сарын хэрэглээ 200.000 төгрөг болдог. Энэ эмийг би 7 жил тасралтгүй ууж байгаа. Улсаас нэг ч удаа хөнгөлөлттэй аваагүй. 

Зөвхөн эм биш тарилга, ампулаар ч байдаг. Яаралтай үед тариаг судсаар хийх шаардлагатай. Гэвч Монголд ганцхан тарилга байдаг. Тэр нь хүртээмжгүй. Уг нь лаагаар байдаг бөгөөд иргэд хүсэлт, саналаа өгсөний үндсэн дээр Герман, Францаас шулуун гэдсээр хийдэг лааг Монос фарм оруулж ирсэн. Гэсэн хэдий ч эмнэлэг, эмийн сангууд нь авахгүй байсаар оруулж ирсэн лааных нь хугацаа  нь дууссан. 

Бидний уудаг эмнүүд тариагаар байдаг. Таталт өгөх үед аппараттай хүмүүс ууж чадахгүй учраас тарилгаар хэрэглэх боломжтой. Бас л манай улсад орж ирээгүй. Хөдөө орон нутагт байгаа ийм өвчтэй хүмүүст огт хүрэлцдэггүй.

Төр хариуцах эмийн жагсаалтад 18 наснаас дээш насны хүмүүс ордог.  Энэ нь уналт, таталттай хүүхэдтэй гэр бүлд хүндээр тусдаг" гэсэн асуудлуудыг хэлж байлаа.