Өнөөдөр дэлхий дахинаа хэрэглэж байгаа хүмүүсийнхээ тал хувийг үхэлд хүргэдэг. Одоогийн байдлаар дэлхий дээр нэг тэрбум гаруй хүн тамхи татаж байгаа бөгөөд жил болгон 6 сая гаруй хүнийг үхэлд хүргэж байна. Хөгжиж буй орнуудад хүн амын хурдацтай өсөлтийн зэрэгцээгээр тамхины үйлдвэрлэлүүдээс явуулж байгаа маркетингийн эрчимтэй үйл ажиллагааны улмаас тамхины хэрэглээ байнга өсөн нэмэгдсээр байна. Хэрэв ийм байдлаар үргэлжилбэл тамхи нь 2030 он гэхэд жилд 8 саяас илүү хүнийг авч одно. Эдгээр үхлийн дөрөвний гурав нь бага болон дунд орлоготой орнуудад тохиолдоно гэж тооцоолж байна.
Тамхины тахалтай тэмцэх асуудал зөвхөн эрүүл мэндийн асуудал төдий бус бүхэл бүтэн улс, үндэстний төдийгүй дэлхий нийтийн хөгжлийн тулгамдсан асуудал болж байгааг харгалзан үзэж дэлхий дахинд тамхидах тахлын тархалт, түүнтэй холбоотой өвчлөл, нас баралтыг бууруулах зорилгоор ДЭМБ-ын санаачлагаар 1999 оноос эхлэн “Тамхины хяналтын суурь конвенц”-ийг боловсруулан 2003 онд Дэлхийн Эрүүл Мэндийн Байгууллагын 56-р Чуулганаар ДЭМБ-ын Гишүүн 192 орон санал нэгтэй баталсан. Тамхины хяналтын суурь конвенц”-д Монгол улс 2004 онд нэгдэн оржээ.
Тамхины хяналтын суурь конвенцийг хэрэгжүүлэх хүрээнд олон сургалт, семинар зохион байгуулагддаг. Үүний нэг нь ТХСК-ийн 14 дүгээр зүйл (Тамхины дасал ба тамхинаас гарахад хамаарах тамхины эрэлт хэрэгцээг бууруулах арга хэмжээний тухай)-ийг хэрэгжүүлэх зорилгоор зохион байгуулагддаг Олон улсын хурал 3 дахь удаагаа БНХАУ-ын Бээжин хотод зохион байгуулагдсан бөгөөд манай улсаас эмч мэргэжилтнүүд 2 дахь удаагаа оролцсон байна.
Монгол улсын харьяалагддаг Номхон далайн баруун эргийн бүс (Western Pacific Region)-ийн тамхины тахалтай тэмцэх үндсэн чиглэл нь техник технологийн дэвшлийг ашиглан тусламж үйлчилгээг өргөжүүлэх, урьдчилан сэргийлэхэд чиглэж байна. Тухайлбал ухаалаг утсанд суурилсан аппликейшн, веб-д суурилсан мэдээлэл, гар утасны мессеж ашиглах гэх мэт шинэлэг санаачилгууд юм. Манай орны хувьд ДЭМБ-ын тусламжтайгаар тамхины чиглэлээр анх удаагаа аппликейшн бүтээж, тамхидалттай тэмцэхээр ажиллаж байна.