Мэргэжлийн хяналтын байгууллагаас хүнсний аюулгүй байдлыг хангуулах чиглэлээр “Хүчит шонхор” худалдааний төвд шалгалт хийсэн байна. 

Тус шалгалтыг мах зөөх тэрэг, хөдөө орон нутгийн машин, дайврын заал, лангуу, жин, халад, махны өлгүүр, хана зэрэг санамсаргүй түүврийн аргаар 80 цэгээс арчдас дээж авч НМХГ-ын лабораторид шинжлүүлэхэд  62 дээжээс гэдэсний халдварт өвчин үүсгэгч enterоbacter spp болон E.coli нян илэрчээ. 

Enterobacteriaсеа овгийн Escherichia төрөл, Escherichia coli- ийн зүйлээр үүсгэгддэг халдварын төрөлд хамаарах бөгөөд  ихэвчлэн төл малд ихээр тохиолддог. Манай орны хувьд энтеробактериоз өвчин нь говь, тал хээрийн бүсийн малд ихэвчлэн гарч голдуу хурга ишгийг олноор өвчлүүлж үхүүлдэг хурц урсгалтай халдварт өвчин юм. 

E.coli нян нь гадаад орчны нөхцөлд тэсвэртэй бөгөөд малын баасанд 30 хоног, ус, хөрсөнд хэдэн сараар амьдрах чадвартай байдгийн зэрэгцээ 55 градусд 1 цаг, 60 градусд 15 мин, 75 градусд 30 сек болоод үхнэ. Халдваргүйтгэх бодис, бэлдмэлүүдэд мэдрэг бөгөөд богино хугацаанд идэвхээ алддаг.