Дэлхийн цаг уурын өдрийг жил бүрийн 3-р сарын 23-нд тодорхой нэг сэдвийн дор тэмдэглэн өнгөрүүлдэг бөгөөд энэ жил “Уур амьсгалын өөрчлөлтийн эсрэг үйл ажиллагааны тэргүүн шугамд” сэдвийг онцолжээ.

Ирээдүй хойч үеийнхний амьдрал бидний гарт байна. Бидний өнөөдрийн хичээл зүтгэл ирээдүй, хойч үеийнхэнд илүү аюулгүй, илүү эрүүл дэлхийг, үр хүүхдүүд маань эх байгальтайгаа зохицон амьдрах дэлхийг бий болгох баталгаа болно.

Энэ дэлхий дээр амьдарч буй хүн бүр 2027 оны сүүлч гэхэд цаг агаар, уур амьсгалын эрсдэлийн мэдээллийг цаг алдалгүй авч, амь насаа авран хамгаалах зайлшгүй хэрэгцээтэй тулгарна гэжээ.

Уур амьсгалын өөрчлөлтийн эсрэг та бидний хийж чадах энгийн зүйлс 

Дэлхийн байгаль хамгаалах сан (WWF)-аас жил бүр уур амьсгалын өөрчлөлтийн талаарх хувь хүний ойлголтыг дээшлүүлж, оролцоог нэмэгдүүлэх зорилгоор “Earth Hour” хөтөлбөр зохион байгуулдаг бөгөөд 190 гаруй орны хүмүүс нэгдэн оролцдог. Уг хөтөлбөр нь нэг цагийн турш дэлхийн бүх хүмүүс нэгэн зэрэг гэрлээ унтраахыг уриалдаг ба хүн бүр эрчим хүчний үйлдвэрлэлээс гарах хүлэмжийн хийн ялгарлыг бууруулахад бага ч болтугай хувь нэмэр оруулах боломжтой гэсэн утгийг илэрхийлдэг билээ. 

Дэлхийн байгаль хамгаалах сан (WWF)-гийн Монгол дахь хөтөлбөрийн газраас "Эх дэлхийн цаг" арга хэмжээг “Говийн гайхамшигт 6” санаачилгын хүрээнд зохион байгуулж, говь нутгийн бэлгэ тэмдэг болсон гайхалтай зургаан амьтны тухай мэдээлэл өгч, эдгээр амьтны ундаалдаг нүдэн булаг, уст цэгүүд хамгааллын ач холбогдолд олон нийтийн анхаарлыг хандуулахыг зорьжээ. Та бүхэн 3 дугаар сарын 23-нд 12:00 цагт Шангри-Ла худалдааны төвд болох "Эх дэлхийн цаг" арга хэмжээнд хүрэлцэн ирж говь нутгийн гайхамшигт амьтдын талаар мэдээлэл авч, асуулт хариултын тэмцээнд оролцож мэдлэгээ сориорой. Мөн энэ үеэр та бүхэн говийн амьтдын амийг тэтгэгч хос нүдэн булгийн эхийг хашиж хамгаалахад хандив өгч, хувь нэмэр оруулах боломжтой.