Хөвсгөл нуур нь Азийн цэнгэг нууруудаас усны эзэлхүүнээрээ хоёрт жагсах бөгөөд дэлхийн цэнгэг усны 0.5 хувийг агуулдаг онцгой ач холбогдолтой. Иймээс нуурын эко системийг хамгаалах, бохирдуулахгүй байхад анхаарал хандуулах нь зүйтэй юм. Гэтэл аялагч амрагчдын хаясан хог, хөрсний бохирдол нэмэгдэж энэ жилийн бүх нийтийн амралтын 5 хоногт гэхэд л Хөвсгөл нуур орчимд 30 тонн хог хаягдал үлдээгээд буцсаныг байгаль хамгаалагчид тээвэрлэн, зайлуулсан байна.  

Урсгал усанд сүү дусаадаггүй, үлдээх буйраа цэвэрлээд буцдаг уламжлалтай бид өнөө цагт байгаль орчин, ундны усны эх үүсвэрээ хамгаалахад онцгой анхаарах цаг болсон. Хөвсгөл нуурын бохирдлыг бууруулах цогц ажлын хүрээнд нуурын зүүн, баруун бүсэд усны суурь судалгаа хийх 10 цэгийн ажиллагааг тогтмолжуулахаар болжээ.

Мөн "Хүслийн хад" орчмыг бохирдлоос сэргийлэх, аялагч, амрагчдын ая тух, аюулгүй байдлыг хангуулах чиглэлээр БОАЖЯ, аймгийн удирдлагууд хамтран ажиллаж цэвэрлэгээ хийжээ.  

• Нэг ширхэг ундааны лааз хөрсийг 100-500 жил, 
• Машины дугуй 30 мянган жил, 
• Шилэн сав сая жил гэх мэтчилэн удаан хугацаанд хөрсийг бохирдуулдаг.

Тэгвэл Хөвсгөл нуурт живсэн машин, техникүүд нь өнөөдрийг хүртэл усыг бохирдуулсаар байна. Эдгээр бохирдлыг шүүж, татан гаргана гэдэг нь нуурын бохирдлыг цэвэрлэхэд онцгой ач  холбогдолтойг эрдэмтэд хэлж байна.