ХСҮТ-ийнхөн тусламж үйлчилгээгээ өргөжүүлэн тэлж, дэлхийн өндөр хөгжилтэй улс орнуудад хэрэглэдэг шинэ дэвшилтэт техник, технологиудыг нэвтрүүлэх, нутагшуулахад ахиц гаргасаар байна.

2024 оны 6-р сарын 19-нд ХСҮТ-д “Монгол улсад биеийн стереотактик туяа эмчилгээг нэвтрүүлэх нь” үндэсний хурал болсон. Монгол улсад стереотактик туяа эмчилгээг нэвтрүүлэх бэлтгэл ажил 2017 оноос эрчимжсэн бөгөөд тухайн үеийн ХСҮТ-ийн ерөнхий захирал  Ж.Чинбүрэнгийн санаачлан эхлүүлсэн хавдрын стеротактик туяа эмчилгээний дэвшилтэт технологийн төслүүд тасралтгүй, амжилттай хэрэгжсээр /2024.06.19/ ийнхүү бодит биеллээ олж байна.

Сүүлийн жилүүдэд хавдрын туяа эмчилгээ эрчимтэй хөгжиж тусламж үйлчилгээнд томоохон ахиц дэвшлүүд гарсаар байна. 2019 онд ХСҮТ-д анхны шугаман хурдасгуурт аппаратуудыг суурилуулж туяа эмчилгээний 20 жилийн хоцрогдлыг арилгаж байсан бол 2022 онд шугаман хурдасгуурт суурилсан туяа эмчилгээний дараагийн дэвшилтэт технологи болох IMRT болон VMAT   технологийг нэгэн зэрэг нэвтрүүлж, Монгол улсын туяа эмчилгээ дэлхийн түвшинтэй хөл нийлэн хөгжиж эхэлсэн билээ.

Энэ оны 3-р сард хамгийн орчин үеийн дэвшилтэт технологи бүхий 3 дахь шугаман хурдасгуур болох TRUEBEAM аппаратыг суурилуулан, Brain Lab навигаци систем бүхий төхөөрөмжтэй болсноор тархи, нугасны хавдрын туяаны мэс заслыг эх орондоо хөгжүүлэх боломж бүрдсэн юм. 

Тэгвэл энэ удаад Монголчуудын нас баралтын тэргүүлэх шалтгааны нэг болсон элэгний хорт хавдар болон өвчлөлийн тохиолдол эрчимтэй нэмэгдэж буй ч тавилан муу хавдруудын нэг болох уушгины хорт хавдарт стереотактик эмчилгээг хийж, эмчилгээний сонголтыг өргөжүүлж байна. 

6-р сарын 18-нд элэгний хорт хавдарт анхны стереотактик эмчилгээг хийсэн нь амжилттай боллоо. ХСҮТ-ийн туяа эмчилгээний багийнхан Нагата профессорын багтай хамтран ажиллаж байна.

Хавдраар өвдсөн иргэд нийгэм сэтгэлзүй, санхүүгийн дарамтгүйгээр эх орондоо элэг бүтэн эмчлэгдэж, эрүүл чанартай амьдардаг боломж улам бүр нэмэгдэж, сайжирсаар байна.